Нейрохирург Мынжылқы Бердіқожаев алғашқы онлайн шеберлік дәрісін өткізді.
Қазақстан медицинасының тарихында алғаш рет Ұлттық госпитальдің нейрохирург дәрігері Мыңжылқы Бердіқожаев Парижде өткен халықаралық LINNC (Live Interventional Neuroradiology & Neurosurgery Course) конференциясында француз әріптестеріне онлайн шеберлік дәрісін өткізді.
Бұл дәстүрлі конференцияға әлемнің жетекші нейрохирургтары, интервенциялық радиологтары мен ғалымдарын жиналады. Дәрігер Қазақстанның ең ежелгі ауруханасының нейрохирургтар командасымен бірге алдыңғы қосымша артерия аневризмасын және қан кетумен бірге артқы бөліктің мальформациясын алып тастау күрделі операцияларын жасады. Ұлттық госпитальдің нейрохирургия бөлімінің меңгерушісі Марат Саршаев Парижде осыған ұқсас тақырыптарды баяндамалармен, шеберлік дәрістерімен толықтырды.
"Бұл оқиға Қазақстан үшін маңызды оқиға болды. Отандық мамандардың жоғары деңгейін және біздің клиникалардың әлемдік стандарттарға сай техникалық жабдықталуын көрсетті. Олар да өздерінің емдеу әдістерін ортаға салады. Бұл тек жеке жетістік емес, сонымен қатар командалық жұмыстың нәтижесі және Отандық медицинаның халықаралық аренада өзгелермен тең дәрежеде екенінің дәлелі", – деді Мыңжылқы Бердіқожаев.
Оқи отырыңыз: Нейрохирург Мыңжылқы Бердіқожаев: "Мүгедек ететін аурулар ішінде инсульт бірінші орында тұр"
Айта кетейік, бұл конференция Францияда 28 жылдан бері өткізіліп келеді. Бұл ел эндоваскулярлық, яғни қан тамырлары арқылы хирургияның отаны ретінде саналады. Әр жыл сайын LINNC конференциясында нейрохирургия және интервенциялық радиология саласындағы бес жетекші елдің дәрігерлері өз жетістіктерін насихаттайды. Бұл тізімге Франция, Канада, Германия және Колумбиямен қатар 2025 жылы Қазақстан да кірді.
2025 жылдың өзінде Ұлттық госпитальдің нейрохирургтары 369 жоғары технологиялық операция жасады.
