Президент Қасым-Жомарт Тоқаевтың 2025 жылды «Жұмысшы мамандықтар жылы» деп жариялауы — ел болашағы үшін аса маңызды шешім. Бұл — білім мен еңбекке негізделген қоғам құру жолындағы нақты қадам.
Бүгінгі таңда елімізге сансыз жоғары оқу орнын бітірген, бірақ нарықта қажеті шамалы мамандар емес, кәсіби білім алған, қолынан іс келетін, өндірістің, ауыл шаруашылығының, қызмет көрсету саласының нақты мамандары қажет. Осы тұрғыда Жамбыл облысы, Қордай ауданындағы №7 Бетқайнар колледжі ұсынған тәжірибе — көпке үлгі.
50 жылдық тарихы бар білім ордасы
1974 жылы негізі қаланған №7 Бетқайнар колледжі — жарты ғасырдан бері ауыл еңбеккерлерін, техникалық бағыттағы мамандарды даярлауға күш салып келе жатқан іргелі оқу орны. Қазіргі таңда бұл колледж — ауылдық өңірдегі еңбек нарығының басты серіктесі ғана емес, өз кәсібін игерген жастардың тұрақты табыс көзіне айналған орталығы.
Колледжде бүгінде 637 студент білім алуда. Олар ауыл шаруашылығын механикаландыру, тігін өндірісі және киім үлгілеу, дәнекерлеу ісі, бағдарламалық қамтамасыз етуді жасау сынды заманауи әрі сұранысқа ие мамандықтарды меңгеріп жатыр. Теория мен практиканы ұштастыра оқыту — колледждің басты ұстанымы. Әр студент оқу процесінде өз кәсібінің барлық қыр-сырын меңгеріп, нақты дағдыға ие болады.
Білім мен өндіріс — егіз ұғым
Колледж директоры Гүлнар Алимбаеваның бастамасымен оқу орны жанынан бірнеше өндірістік жоба іске қосылған. Атап айтқанда, тігін цехы мен шағын кәсіпорын ауыл тұрғындарына жаңа жұмыс орындарын ұсынып қана қоймай, түлектерге де кәсіби машықтарын нақты жағдайда жүзеге асыруға мүмкіндік беріп отыр.
Қазіргі таңда колледж жанындағы тігін цехында 40 адам жұмыс істейді. Оның ішінде колледжді аяқтаған түлектер мен жергілікті тұрғындар бар. Бұл жерде ұлттық нақыштағы киімдер, заманауи үлгідегі костюмдер мен бұйымдар тігіліп, нарыққа шығарылуда. Цехтың өнімдері сұранысқа ие, ал оның артында мамандардың кәсіби қолтаңбасы тұр.
Оқу орны жанындағы тағы бір жоба — оқу шаруашылығы. Мұнда студенттер мал шаруашылығы саласын меңгеріп, тәжірибе жинақтайды. Колледжде бүгінде 137 бас қой бағылады. Алынған 450 кг жүн тігін цехына жеткізіліп, одан көрпе мен ұлттық бұйымдар жасалады. Бұл — «өнім өндіру – өңдеу – өткізу» тізбегі толық қамтылған тиімді әрі заманауи оқу моделінің мысалы.
«BK-7 Textile» — мамандықты брендке айналдыру
Колледждегі маңызды жобалардың бірі — «BK-7 Textile» бағыты. Бұл бастама тігін және тоқыма өнеркәсібі саласында жоғары сұранысқа ие мамандар даярлауға арналған. Бұл бағыт бойынша оқып жатқан студенттер өндірістің барлық кезеңдерін игереді, заманауи құрал-жабдықтарда жұмыс істеп, нарық талабына бейімделеді.
Мамандықтың бренді ретінде қалыптасуы оның беделін арттырумен қатар, жастар арасында қызығушылық тудыруда. Бүгінде бұл жоба арқылы дайындалған бұйымдар өңірлік жәрмеңкелерде, онлайн сауда платформаларында да сатылып жатыр.
Ауыл экономикасын жаңғыртатын күш
№7 Бетқайнар колледжі ауыл тұрғындары үшін де, жас түлектер үшін де маңызды әлеуметтік тірекке айналған. Колледждің тәжірибесі көрсетіп отырғандай, жұмысшы мамандықтарын меңгерген жастар тек өз болашағына жол ашып қана қоймайды, ауылды да жаңғыртады, жергілікті өндірісті дамытады, ұлттық өнерді жаңғыртады.
Бұл оқу орнында тек кәсіби машық емес, сонымен бірге ұлттық құндылықтарға деген құрмет, еңбекке деген сүйіспеншілік тәрбиеленеді. Колледж студенттері түрлі байқаулар мен жарыстарда облыстық, республикалық деңгейде жеңістерге жетіп, шеберліктерін дәлелдеп жүр.
2025 жыл — жұмысшы мамандықтардың жаңа дәуірі басталатын жыл. №7 Бетқайнар колледжі көрсеткен үлгі — ауылдағы кәсіптік білім беруді дамытудың нақты жолы. Техникалық және кәсіптік білім беру жүйесінің шын мәнінде экономикаға үлес қосуы үшін дәл осындай оқу орындары керек. Бұл — еңбек адамының абыройын арттыратын, жастардың өмір сүру сапасын жақсартатын нақты жобалар.
