Франция ашық чемпионатында Александр Бублик бірден ТОП-10 рейтингіндегі екі теннисшіні жарыс жолынан тайдырды.
Қазақстандық теннисші Александр Бублик (№62) тарихтың жаңа парағын ашты. Ол Ролан Гаррос турнирінде керемет өнер көрсетіп, “Үлкен дулыға” жарыстарының жекелей сынында алғаш рет ширек финалға жолдама алды. Бұл оның спорттық мансабындағы үлкен жетістік әрі қазақстандық теннис тарихындағы айтулы оқиға.
Енді Бублик ширек финалда әлемнің бірінші ракеткасы, италиялық Янник Синнермен 4 маусым күні (№1) кортқа шығады. Бұл тартысты кездесуде отандасымыз өз шеберлігін тағы бір мәрте дәлелдеуге тырысады.
Ширек финалдың өзге жұптарының матчтары да аса қызықты болғалы тұр:
Александр Зверев (№3) — Новак Джокович (№6)
Лоренцо Музетти (№7) — Фрэнсис Тьяфо (№16)
Томми Пол (№12) — Карлос Алькарас (№2)
Синнер – Бублик матчы 4 маусым күні сағат 14:00-де өтеді.
Жеке кездесулерде Синнер 3:1 есебімен алда тұр. Алайда соңғы кездесу 2023 жылғы маусымда Германияның Галле қаласында өткен турнирде Бубликтің пайдасына аяқталды. Синнер есеп 5:7, 0:2 кезінде матчты тоқтатуға мәжбүр болды. Сол жарыста Бублик ақтық сынға дейін жетіп, чемпион атанған еді.
