Атырау облысында қамыс алқаптарында тұтанған өрт толықтай өшірілді.
"Ақжайық" мемлекеттік табиғи резерваты аумағындағы қамысты алқапта шыққан өрт алдын ала есеп бойынша 1050 гектар аумақты шарпыған, деп хабарлайды inbusiness.kz сайты.
Қазіргі таңда Төтенше жағдайлар министрлігі (ТЖМ) өрт орнында үздіксіз байланыс орнату үшін командалық-штабтық машинаны орналастырды. Өртті сөндіру жұмыстарына су шашатын құрылғысы бар ТЖМ тікұшағы тартылды. Әуеден 10 мәрте су төгіліп, жалпы көлемі 30 тонна су пайдаланылды.
Сондай-ақ, қызыл жалынды ауыздықтауға Атырау облысы ТЖД және "Ақжайық" резерватының 110 маманы, 26 техника, сондай-ақ ТЖМ-ге қарасты "Қазавиақұтқару" АҚ тікұшағы да жұмылдырылды.
Өрт сөндірушілер екпіні қатты жел мен батпақты жерлерге қарамастан күрделі жағдайда жұмыс атқарды. Өрт шыққан аумаққа техникамен жету қиынға болғандықтан, Төтенше жағдайлар министрлігінің әуе күштері көмекке тартылды.
