2025 жылғы 2 маусымда Қазақстан Республикасы Қорғаныс министрлігі алғаш рет әскери борышын өтеген сарбаздарға елдің алдыңғы қатарлы жоғары оқу орындарында оқуға арналған мемлекеттік білім гранттарын табыстады, деп хабарлайды Zakon.kz тілшісі.
Астанада өткен салтанатты рәсімде генерал-майор Шайх-Хасан Жазықбаев әскери дайындықта үздік нәтиже көрсеткен 2024 жылдың көктемінде шақырылған 20 сарбазға оқуға сертификаттар тапсырды.
Ұлттық бірыңғай тестілеуді (ҰБТ) тапсырмай-ақ жоғары оқу орнына түсу мүмкіндігі – мерзімді әскери қызметке ынтаны арттыруға, жас мамандарды қолдауға және олардың кәсіби өсуін ынталандыруға бағытталған мемлекеттік бастама.
Генерал-майор Шайх-Хасан Жазықбаевтың айтуынша, бұл байқауға Қазақстан Қарулы Күштері, Мемлекеттік күзет қызметі, Төтенше жағдайлар министрлігі, Ұлттық қауіпсіздік комитетінің Шекара қызметі мен Ұлттық ұланның әскери бөлімдерінде белгіленген мерзімде қызмет еткен 17 500-ден астам сарбаз қатысқан.
"Араларыңызда әскери оқу орындарына түсіп, офицер болуға бел буғандар бар екені қуантады. Бұл – армия сізге жауапкершілік, тәртіп және отансүйгіштік секілді қасиеттерді дарытқанын көрсетеді. Оқуда да әскери қызметтегі сияқты жоғары нәтижелер көрсететініңізге сенімдімін", – деді генерал-майор.
Ол сондай-ақ Қорғаныс министрлігі тарапынан мерзімді әскери қызметін өтеген азаматтарға арналған түрлі жеңілдіктерді кеңейту жұмыстары жалғасатынын жеткізді.
Мерекелік шарада сөз алған мерзімді әскери қызмет сарбазы Владислав Внуковский Қазақстан Қарулы Күштері Әуе қорғанысы күштерінің 44813 әскери бөлімінде борышын өтегенін айтып, алғысын білдірді.
"Қарулы Күштер қатарындағы қызмет мен үшін ерлік, тәртіп пен төзімділік мектебі ғана емес, командалық жұмысқа үйреткен маңызды кезең болды. Мен еліміздің тәуелсіздігі мен тұтастығын қорғай алатын қуатты әрі кәсіби армияның бір бөлігі болғаныма мақтанамын. Бүгін мен қазақстандық ЖОО-да оқуға арналған сертификатты алып, әкемнің жолын жалғастыруға шешім қабылдадым. Әуе қорғанысы күштері әскери институтына оқуға түсіп, офицер боламын", – деді ол.
Внуковский Талғат Бигелдинов атындағы ұшқыштар училищесіне (Ақтөбе қ.) түсетінін айтты.
"Емтиханға дайындық қиын болмады – оқыдық, тырыстық. Соңында ең жоғары балл жинадым. Ұшқыш болу арманы армияда жүргенде пайда болды. Менің таңдауым – әскери-көліктік авиация ұшқышы мамандығы. Қызметім тыныш өтті, күрделі жағдайлар болмады. Мен есеп бөлімінің бастығы болдым. Міндеттеріме 500 шақырым радиустағы әуе кеңістігін бақылау, ұшып келіп-кеткен әуе кемелерін тіркеу, байланыс орнату кірді", – деп бөлісті Владислав.
Шараға сарбаздардың ата-аналары мен армия арқылы ЖОО-ға түскен елордалық студенттер де қатысты. Внуковскийдің әкесі, отставкадағы подполковник Фёдор Внуковский олардың отбасы үш ұрпақтан бері жалғасып келе жатқан әскери әулет екенін айтып, ұлының бұл жолды саналы түрде таңдағанын жеткізді.
"Әйелім екеуміз мен прапорщик, ол – кіші сержант болған кезде танысқанбыз. Төрт бала тәрбиеледік, жалғыз ұлымыз – үмітіміз. Үздік қызмет атқарып, кіші сержант шенін алып, взвод командирі болды. Біз үшін оның грант алып, емтиханды сәтті тапсырғаны тосынсый болды. Мен оған "Демек, оның тағдырына – әскери болу жазылғанын айттым". Біз онымен мақтанамыз және үлкен жетістіктерге жететініне сенеміз, – деді әкесі.
Келісі бір грант иегері – Әлихан Бухаев. Ол әскери қызметтің оңай болмағанын, дегенмен бұл жолды абыроймен өткергенін айтты. Әлихан арнайы мақсаттағы бригадада снайпер болып қызмет атқарған.
"Емтихан қарапайым тестілеу форматында өтті. 1-9 сыныптар мен колледжде алған білімім септігін тигізді. 95 балл жинадым. Колледжден соң бірден әскерге кеттім. Ондағы бар ойым – Отан алдындағы борышымды өтеу. Сол жерде әскери қызметтен кейін мемлекеттік грант алуға болатынын білдім. Қазір Павлодардағы Торайғыров университетінің "кен ісі" мамандығына құжат тапсырып жатырмын, – деді ол.
Қорғаныс министрінің кеңесшісі Айгүл Төлембаева сарбаздардың қызмет барысында бос уақытында профильдік пәндерден емтиханға дайындалғанын айтты. Бұл үшін "Срочник 2.0" атты арнайы ақпараттық жүйе бар, онда 10-11 сыныптарға арналған барлық оқулықтар жүктелген.
"Әрбір қатысқысы келген сарбаз өтініш жазып, мамандығы мен ЖОО-ны таңдайды. Кейін әскери қызметтегі көрсеткіштері – жауынгерлік, мемлекеттік-құқықтық, атыс, дене, саптық дайындықтар мен екі профильдік пән бойынша тестілеу нәтижелері ескеріледі. Барлық балл қосылып, жалпы рейтинг түзіледі. Грант алғандардың тізімі Қорғаныс министрінің бұйрығымен бекітіледі. Осылайша, әскери қызметте өзін жақсы көрсеткен адамның грант алу мүмкіндігі жоғары болады, – деді кеңесші.
Ол бұған дейін тек ЖОО гранттары болғанын, ал қазір бұл толыққанды мемлекеттік гранттарға ауысқанын айтты. Олар шәкіртақы алады және жатақханадан орын алу мүмкіндігі кеңірек. .
