Өскеменде апатты үйлердің тұрғындары көшірілуі мүмкін. Әзірге 29 пәтер сатып алуға бюджеттік өтінім берілді. Облыс орталығында тозығы жетіп тұрған 37 үй бар. 20 жыл бұрын тұруға жарамсыз деп танылған баспаналарда адамдар әлі өмір сүріп жатыр. Олар қауіпті сезсе де, «Барар жеріміз жоқ», – деп амалдап келеді. Қалада төбесі опырылып, іргетасы шіріп тұрса да, ескі баспанасын апатты деп дәлелдей алмай жүрген жандар да жетерлік.
Өскеменде жалпы 1804 көппәтерлі үй бар. Соның жартысы осыдан 55-60 тіпті 80 жыл бұрын салынған. Мұндай үйлер әсіресе қаланың «Өнеркәсіптік аумағында» көп. Әбден тозығы жетіп тұрған осы баспаналардың 37-сі осыдан 20 жыл бұрын апатты деп танылған еді. Алайда содан бері бұл құжат қағаз жүзінде ғана қалып, тұрғындар қауіп ортасында талай жыл үмітпен өмір сүріп келді. Көпшілік күткен мәселе оң шешім табар күн енді жақындады. Бұл мақсатта алдымен 29 пәтер сатып алу жоспарланған.
Назгүл Жақыпбекова, қалалық тұрғын үй қатынастары бөлімі басшысының орынбасары:
- Бұл бағытта облыста 2024-2029 жылдарға арналған «Жол картасы» және де «Тұрғын үй қорын жаңарту бағдарламасы» бекітілді. Соған сай облыстық мәслихат отырысында 29 пәтер сатып алу үшін 488 миллион 500 мың теңгеге өтінім берілді.
«Кезекте тұрған жалпы 104 адамды бірден жаңа пәтермен қамту мүмкін емес», – дейді мамандар. Сондықтан жоба кезең-кезеңмен жүзеге асырылады. Алайда қалада іргетасы ыдырап, төбесі опырылып тұрған баспаналарының апатты екенін дәлелдей алмай отырған әлі қаншама жұрт бар.
Промышленная көшесінде тұратын зейнеткер Виктор Данченко: «Әркез үрей үстінде жүреміз», – дейді. Өйткені бұған дейін 2 рет пәтерінің төбесі опырылып түскен. Апатты екені көзге көрініп тұрса да, оны растайтын құжатты жасата алмай отыр.
Виктор Данченко, үй тұрғыны:
- Төбе ортасына түскенде өзіміз аман қалғанға қуандық. Төбемен қоса қабырғаның сылағы да сыпырылып түсті. Баспана әрең тұр. Бірақ оны апатты деп тану үшін тәуелсіз сараптама жүргізілу керек. Ол 300-400 мың теңге тұрады. Ондай ақшаны қалтамыз көтермейді. Мұнда өңкей кәрі-құртаң тұрып жатырмыз.
Қарияның көршілерінің де жағдайы мәз емес. Ондаған үйдегі жұрттың уайымы ортақ.
Светлана Маринина, қала тұрғыны:
- Осы маңдағы тұрғындардың пәтері оңып тұрған жоқ. Қыс ортасында көршімнің төбесінің ортасы түсті. Алдында ғана күрделі жөндеу жасап, қуанып жүр еді. Енді, мінеки, тағы да алаңдап қалды. Қашанғы осылай жүретінімізді ешкім білмейді.
Тұрғын үй қатынастары бөлімінің мамандары: «Бұл жағдайдан хабардармыз», – дейді. «Бірақ апатты деп танылған баспаналар мәселесі толық реттелмей, ескі үйлердің шаруасын шешуге кірісе алмаймыз», – деген уәж айтты.
Авторлары: Эльмира Ахметова, Жігер Бабаханов
