Бірнеше жерде жұмыс істейтін азаматтар әр жұмыс орнынан МӘМС-ке жарна төлеп, артық шығынға батып жатқандарын айтып шағымданды. Депутаттар бұл мәселені күзде Үкіметке ұсынбақ. Мақсат — жүйені жеңілдетіп, халыққа тиімді ету. Қазірдің өзінде қор тарапынан кей ұсыныс қаралып жатыр.

Кәсіпкерлер МӘМС төлем тәртібінің қолайсыз екеніне шағымдануда. Айтуларынша, жеке кәсіпкер ретінде ресми тіркелген, бірақ ол жақтан табысы жоқ, соған қарамастан жарна төлеуге міндеттелген. Одан бөлек жалдамалы жұмысынан да жарна төлейтіндерін айтты. Бұл түсінбеушілік тудырып отыр. Себебі ай сайынғы төлемді іс жүзінде қолданбаймыз дейді.

Дәурен Құдайбергенов, қала тұрғыны:

Кәсіпкермін. Қазір ЖК тоқтап тұр. Бірақ ашық. ЖК бар. Бірақ тоқтап тұрғандықтан, жалдамалы жұмысшы ретінде жалақыға қызмет етемін. 1 емес, 2 жұмыста істеймін. Сонда да менде ИП-дан да, мына жалақыдан да МӘМС-ке төлеп жатырмын. Айына 6 мың теңгеден төлеймін. Бәрі жиналып жатыр. Бірақ одан маған келетін ешқандай пайда жоқ. Қайда кетіп жатыр, мен оны қолданбасам?

Бұл мәселе Мәжіліс қабырғасында да талай көтерілген. Депутаттар бұған дейін 5 жыл бойы үздіксіз МӘМС жарнасын төлеген азаматтарға жарнаның бір бөлігін жеке медициналық қызметке пайдалану мүмкіндігін ұсынды. Бұл бастама күзде тағы көтерілмек.

Айдос Сарым, ҚР Парламенті Мәжілісінің депутаты:

Белгілі бір азамат тұрақты, үзбей, үздіксіз, ұзақмерзімді ақша төлеп отыратын болса, оның ішінде белгілі бір пайызын сол адамның атына жазып, атаулы қылса дейміз. Мысал үшін, мен он жыл ауырмауым мүмкін, он бес жыл ауырмауым мүмкін. Бірақ бір күні ауырған кезде маған қажет кезде ол ақшаны қайдан іздеп жүремін? Сондықтан менің өзімнің жеке карточкам болса немесе телефондағы арнайы қондырғым болса, сол арқылы қарап отырсам.

Мамандардың айтуынша, азамат бірнеше жерде жұмыс істеген күннің өзінде әр жұмыс орнынан жарна ұсталып, төленуі тиіс. Заң бойынша, МӘМС жарналары қайтарылмайды. Себебі бұл жүйе жинақтаушы емес.

Забира Оразалиева, «Әлеуметтік медициналық сақтандыру қоры» басқарма төрағасының кеңесшісі:

Ол бірнеше жерде жұмыс істесе де, дәл осылай бірнеше жерден төлем жасалады. Енді бір ғана жеңілдігі бар. Мысалы, бір азамат бірнеше жерде жұмыс істеп жатып, әр жерден жинақталған кезде, барлық, осы үш жердің табысы, мысалы, ең төменгі айлықтың онын құрайтын болса — ол 850 000 тг қазіргі таңда. Онда сол 850 мыңнан аспайтын сомманың ғана 2 пайызын ұстап отыратын болады.

Дегенмен бұл мәселеге депуттаттар алдағы күзде қайта оралмақшы. Оғанға дейін ұсыныстар қаралып, талқыланады.

Динара Жарқынбек