Араб жерінде екі әлемдік рекорд тіркелді.

Әмірлік зергерлері алтынмен апталып, гауһар таспен көмкерілген ең бағалы бұйымдар жасады. Қос қолөнер туындысы Шарджада өтіп жатқан қымбат сағаттар мен әшекейлер көрмесінде таныстырылды. Оның бірінде шейх Заид бейнеленіп, жақтауында 7 бірдей Әмірліктің танымал сәулет нысандары көрініс тапты.

Бұл күндері Араб Әмірліктерінің Шарджа шаһары алтынмен апталып тұр. Гауһар және жақұт тағы бар. Бағалы бұйым іздеген әйел де, ер де мұнда қалауын табады. Себебі әмірлік кезекті рет дүниежүзіндегі ең қымбат әшекей және сағат көрмесін ұйымдастырып отыр. Ауқымды іс-шара аясында жергілікті зергерлер Гиннестің рекордтар кітабына енді. Солардың бірі ешбір жерде баламасы жоқ алтын жақтау жасап шығарды. Оған Шейх Заид Әл Нахаянды бейнелеп, ұлт мақтанышына деген құрметін білдірді.

Әли Әляфи, зергер, жоба авторы:

- Бұл жақтауды жасауға Шарджада 1973 жылдан бері жұмыс істейтін әшекей бұйым фабрикасы көмектесті. Оған 21 каратты алтын қолданылды. Толықтай қол еңбегі саналады. Аса дәлдікті қажет ететін аздаған бөлігі ғана 3D принтерде басып шығарылды. Жұмыс 3 айға созылды және 30 шебер тынымсыз тер төкті.

Жалпы қазақ халқы секілді араб жұртында да 7 саны киелі. Ол сәулет нысандары мен көрнекі құралдарда кеңінен қолданылады. Алтын жақтауда да сол ерекшелікті аңғару қиын емес. Айталық, қолөнер туындысынан елдің ең үлкен мешіті мен ғимаратын, сондай-ақ құран кітабын көруге болады. Жоба авторлары «мұны жасаудағы мақсат – елдің алтын өндірісін қолдау», — дейді. Гиннестің рекордтар кітабына тіркелген тағы бір рекорд – ұзындығы 108 метрлік алқа. Тұтасымен 750 сынамалы алтыннан жасалған. Гауһар таспен әрленген әшекей сатылымға шығарылды. Тұтынушылар арасында әзірге бүтіндей аламын деушілер табылған жоқ. Сондықтан шағын бөліктермен саудаланып жатыр.

Джули Франкул, көрмеге қатысушы:

- Бүгін мұнда әйелдер қауымының қарасы қалың. Ол түсінікті де. Әдемілік, сұлулық іздеп, бағалы тастардан әшекей сатып алуға келдік. Қалаған дүниенің бәрі бар. Араб қыз-келіншектері алтын мен гауһарды аса жоғары бағалайды. Ол құрметтің бір белгісі іспеттес.

Шарджадағы көрме Таяу Шығыс кеңістігіндегі ең ірі алтын базарына баланған. Оған 80 мыңнан астам қатысушы жиналды. Үндістаннан да коллекция жинақтаушылар келген. Ғаламдық алтын саудасына оң ықпал ететін іс-шара бірнеше күнге жалғасады. Еске салайық, әмірлік әлемдегі ірі алтын өндіруші саналады. Оның осы саладан тапқан табысы былтыр 190 млрд доллардан асты.

Рауан Мыңбай