Бүгін 16 жастағы Шерзат Полаттың өліміне айыптау жөніндегі іс бойынша ашық сот процесінің бірінші бөлімі аяқталды.
Онда жәбірленуші тараптың адвокаты болған бірнеше адвокаттың сот отырысынан шеттетілгені нақтыланды, деп хабарлайды inbusiness.kz сайты.
Сөз кезегін сұраған адвокаттарға сот Ержан Жанұзақов "Сіздерге рұқсат жоқ, сіздерден жәбірленушілер бас тартты ғой, сотқа қатысуға" деп жауап берді.
"Яғни, бізден Мейірман Шекеев бас тартты ғой, сотқа қатысып, жарыссөзде соңғы сөз сөйлеуге?" деп нақтылады адвокат Бағдат Амандосұлы. "Бас тартып отыр ғой" деп қорытындылады сот Ержан Жанұзақов.
– Құрметті сот, аталған өтінішхат ол жеке тұлғаның атынан берілген. Ал бізге сенімхат 5 адвокатқа заң компаниясының атынан берілген. Яғни, қазіргі кезде өтінішхатты Мейірман Шекеев компаниясының атынан беруі тиіс. Алайда ол жеке тұлға ретінде беріп отыр. Сондықтан, қазіргі кезде берген өтінішхаты ол негізсіз, сонымен қатар жарыссөзде өтінішхатты жариялау болмайды. Сол үшін Мейірман мырзаның қабылдаған өтінішхатын қараусыз қалдыруды, сосын жарыссөзге жіберуді сұраймын, – деді Бағдат Амандосұлы.
Сондай-ақ, тағы бір адвокат "Бізде келісімшартта көрсетілген 5 жұмыс күні ішінде бізге хабарлауға тиіс. Ал бізге қазір, сотта ғана айтып отыр "боссыздар" деп, Бұл ақылға сыйымсыз" деген уәжін айтты.
Өз кезегінде Ержан Жанұзақов "Бұл шешімді Мейірман Шекеев жалғыз қабылдаған жоқ, жәбірленушілердің өзі қабылдап отыр. Олар бас тартуына байланысты сіздер сот отырысынан шеттетіліп отырсыздар" деді.
Ал М.Шекеевтің "түсіндіріп кетейінші" дегенін сот "қажет емес" деп үзілді-кесілді қарсы болды. Одан соң Бағдат Амандосұлы бастаған адвокаттар рұқсат сұрап, сот залынан шығып кетті.
Бұған дейін тағы бір танымал қорғаушының Шерзат Полат ісінен шеттетілгенін жазған едік.
