Мемлекеттік қызмет жүйесінің тиімділігі, ең алдымен, кадрлардың тұрақтылығымен және кәсіби дайындығымен өлшенеді.
Батыс Қазақстан облысы бойынша 2 096 мемлекеттік қызметші еңбек етіп жатыр.
"Бұл – үлкен әлеуеті бар корпус. Тағы бір маңызды көрсеткіш – 13 жылдық орташа еңбек өтілі. Бұл қызметшілердің салада ұзақ уақыт жұмыс істеп, тәжірибе жинақтағанын білдіреді. Ал лауазымдағы орташа өтіл – 4,6 жыл, яғни кадрлар тұрақты, айналым аз." Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
Есептік кезеңде 311 адам мемлекеттік қызметке тағайындалды. Бұл – жаңару мен іріктеудің жүріп жатқанын көрсетеді. Таңдалған кадрлар – білімі бар, әлеуеті зор азаматтар.
"Кәсіби мемлекеттік аппарат – халық пен билік арасындағы алтын көпір", – деп атап өткен Мемлекет басшысы Қасым-Жомарт Тоқаевтың бұл сөздері біздің қызметіміздің мәнін анықтайды.
Өңірлік кадр резерві қалыптасты. Өңірлік кадрлық резерв – мемлекеттік қызметтің болашағын қалыптастыратын, кәсіби әрі құндылыққа негізделген басқарушыларды іріктейтін алаң.
"Біз резервті жай ғана кадр базасы ретінде емес, стратегиялық әлеуетті қалыптастыру құралы деп қараймыз." Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
Резервке іріктеу — ашық, бәсекелі негізде өтеді. Үміткерлер кәсіби білімімен қатар, көшбасшылық қабілеті, қоғамдық белсенділігі және құндылықтық ұстанымдары бойынша бағаланады. Іріктеуден өткен тұлғалар – жаңа буын, олар болашақта ауыл, аудан, қала деңгейінде шешім қабылдайтын мамандар қатарын толықтырады.
"Мемлекеттік қызмет — тұрақтылық пен жаңашылдықтың үйлесімі. Резерв осы екеуін ұштастырып отырған құрал. Резервтегі мамандарды жүйелі түрде оқыту, тәлімгерлікпен қамту және нақты жобаларға тарту жұмыстарын күшейттік." Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
"Кадр – бәрін шешеді" деген сөз ешқашан маңызын жоғалтқан емес. Бүгінгі таңдағы міндетіміз – болашақ әкімдер мен басшыларды бүгіннен дайындау.
Резервке енген азаматтар арасынан аудандарда дербес бөлім басшылары, облыстық басқармаларда бөлім басшысы қызметіне тағайындалғандар бар. Демек, жүйе жұмыс істеп тұр, резервшілердің әлеуеттері еленіп, нақты мүмкіндіктер ашылып жатыр
Мемлекеттік қызметшілердің құқықтарын қорғау. Заң – барлығына ортақ. Мемлекеттік қызметшілер де әділдікке, қорғанысқа, ашықтыққа құқылы.
Есептік кезеңде 114 адамның бұзылған құқықтары қалпына келтірілді. Аталған санның артында шынайы тағдырлар, кәсіби беделі қорғалған адамдар тұр. Жүйелі жұмысымыздың арқасында 6 мемлекеттік қызметші өз лауазымына қайта оралды немесе оларға қабылданған негіссіз және заңсыз шешімдер қайта қаралды.
"Біз үшін бұл – формальды статистика емес, адамның құқығының үстемдігін іс жүзінде қамтамасыз ету жолындағы нақты нәтижелер." Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
Әдеп нормаларын сақтау. Мемлекеттік қызметші – халықтың алдында тұрған тұлға, оның сөзінен де, жүріс-тұрысынан да мемлекет көрінеді. Сондықтан этикалық нормаларды сақтау – тек тәртіп мәселесі емес, бұл ішкі мәдениетті қалыптастыру.
Әдеп кеңесінің үш отырысында тәртіптік сипаттағы және профилактикалық 17 мәселе қаралды, 31 нақты ұсыныс жасалды. Ұсыныстар барлық мемлекеттік органдарға жолданып, толығымен орындалды. Тәртіп бұзған 5 лауазымды тұлғаға шара қолданылды, оның ішінде қызметінен босатылғандар да бар.
"Этика – бұл мемлекеттің ішкі мәдениетінің көрінісі", – деген болатын саясаттанушы Ғазиз Әбішев. Біз де дәл осы ұстаныммен жұмыс істейміз.
Ауыл әкімдерінің оқытылуы. Ауылдық округ әкімдері – елдегі басқару жүйесінің "алдыңғы шебі", олар тікелей халықпен жұмыс істейді. Сондықтан олардың кәсіби деңгейін арттыру – стратегиялық міндет.
"Біз арнайы ұйымдастырған оқу семинарларында ауыл әкімдері тек құқықтық біліммен ғана емес, басқару мәдениетімен, дағдарыс жағдайындағы шешім қабылдау тетіктерімен, коммуникация құралдарымен де танысты. Жобалық басқару, цифрлық қызмет көрсету, деректермен жұмыс істеу – бәрі қамтылды." Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
Бұл – заманауи әкімнің бейнесіне сай білім беру. Ауыл әкімінің шешімі – тұрғынның тұрмыс сапасына тікелей әсер ететінін ұмытпауымыз керек.
"Мемлекеттік қызмет көрсетудің сапасы ғана емес, азаматтардың құқығын қорғау да маңызды. Мемлекеттік қызмет – халыққа қызмет көрсету. Сондықтан әрбір қызмет алушының құқығын қорғау – біздің тікелей міндетіміз." Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
Есептік кезеңде бізге мемлекеттік қызмет көрсетудің сапасына қатысты 16 шағым түсті. Бұл – азаматтардың белсенділігін, мәселелерге бейжай қарамайтынын көрсетеді. Соның ішінде 12 шағым негізді деп танылып, нақты шаралар қабылданды: кінәлі мамандарға тәртіптік ықпал ету, жүйелік кемшіліктерді түзету бойынша ұсыныстар енгізілді.
Біз әрбір өтінішке жай ғана есеп ретінде қарамаймыз – бұл нақты азаматтың мәселесі, көңіл күйі, сенімі. Сондықтан әрбір арыз бойынша жан-жақты сараптама жүргізіліп, заң аясында шешім шығарылады. Қызмет алушылардың құқығы қалпына келтірілген жағдайда, біз үшін ең үлкен нәтиже.
Сонымен қатар, 25 қоғамдық қабылдау, 20 онлайн жәрмеңке,
11 тікелей эфир өткіздік – бұл құралдар азаматтардың бізге тікелей жүгінуіне мүмкіндік береді. Біз "тыңдай алатын мемлекет" қағидатын нақты әрекетпен көрсеткіміз келеді.
"Азаматтың сенімі – мемлекеттік аппараттың ең басты капиталы", – деп атап көрсеткен болатын Мемлекет басшысы. Біз осы сенімге лайық болуға бар күшімізді саламыз. Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
Мемлекеттік қызметтің болашағы. Мемлекеттік қызметтің болашағы – азаматқа бағдарланған, цифрландырылған, кәсіби жүйе. Бұл жүйеде басты орын – адамға беріледі. Президентіміз айтқандай: "Ең алдымен адамдар". Біз осы ұстанымды күнделікті жұмысымыздың өзегіне айналдырдық.
Біздің міндет – халыққа адал қызмет ететін, заң мен ар-ожданды басшылыққа алатын мемлекеттік аппарат қалыптастыру. Бұл жолда тоқтап қалуға болмайды – әр күн даму, жаңару, жетілуге бағытталуы тиіс. Мұрат Байсалов, ҚР Мемлекеттік қызмет істері агенттігінің БҚО бойынша департаментінің басшысы
