Елорданың «Ғашықтар» саябағында Еуропа күніне арналған ашық фестиваль – EuroFest 2025 өтті. Фестиваль қонақтары Еуроодақ елдерінің ұлттық тағамдары мен сусындары ұсынылған еуропалық жәрмеңкеге қатысуға мүмкіндік алды, деп хабарлайды El.kz ақпарат агенттігі.
Қала әкімдігінің ақпаратына сүйенсек, келушілерге ЕО-ның Қазақстан мен Орталық Азиядағы жобалары туралы ақпараттық стендтер де дайындалған. Бұл жобалар білім беру, тұрақты даму және инновация салаларын қамтиды.
Сондай-ақ сахнада түрлі елдердің өнерпаздары өнер көрсетті.
Іс-шара аясында балалар мен ересектерге арналған ойын, шеберлік сабақтары мен түрлі қызықты бағдарламалар ұйымдастырылған интерактивті аймақтар жұмыс істеді. Ұйымдастырушылардың айтуынша, фестиваль аясында жиналған барлық қаражат жергілікті қайырымдылық ұйымдарын қолдауға бағытталады. Себебі EuroFest – бұл мәдениеттер мерекесі ғана емес, өзара көмектің де алаңы.
Бүгін өз мәдениетін – тағамын, кітаптарын, дәстүрлерін – осы мерекеге арнаған елдердің елшілеріне үлкен алғыс білдіремін. Бұл – олардың жеке үлесі. Бүгін бізбен бірге осы мейрамды атап өтуге келген қонақтарға да алғыс айтамыз. Міндетті түрде стендтерге келіңіздер – біз арнайы камералар орнатып, олардан сахнаға тікелей көрсетілім жүргіземіз, – деді фестивальдің ашылуында Еуропа Одағының Қазақстандағы Елшісі Алешка Симкич.
