Күншығыс елі интернет жылдамдығы бойынша жаңа жетістікке жетті. Зерттеушілер деректерді секундына 1,02 петабайт (127,5 мың ГБ) жылдамдықпен 1808 шақырым қашықтыққа жібере алған, деп жазады inbusiness.kz сайты.
"Жаңа технология 19 тәуелсіз ядролы оптикалық кабельді қолданды, олардың әрқайсысы деректерді параллель түрде жіберді. Қалыңдығы небәрі 0,125 мм (стандартты талшық сияқты) бұл кабель 19 талшықты деректер жолымен салыстырылатын өткізу қабілеттілігін қамтамасыз етеді", — делінген хабарламада.
Негізгі жетістік ұзақ қашықтықтағы сигналдың әлсіреу мәселесін шешу болды. Зерттеушілер барлық 19 ядро үшін кедергісіз екі жарық диапазонында (C және L) бір уақытта жұмыс істейтін күшейту жүйесін жасады.
Ғалымдар бұл технология әсіресе жасанды интеллект пен 6G коммуникациясын дамыту жағдайында өзекті екенін айтады. Заманауи желілер өсіп келе жатқан деректер трафигіне төтеп бере алмайды — болжамдар бойынша 2030 жылға қарай деректерді тасымалдау қажеттілігі 100-1000 есе артады.
Хабарламада айтылғандай, бұл талшық қолданыстағы инфрақұрылымды елеулі өзгерістерсіз пайдалануға мүмкіндік береді. Дегенмен, әзірге бұл зертханада жұмыс істеп жатыр және технологияның қарапайым пайдаланушыларға қашан жететіні белгісіз.
