Бүгін – Халықаралық балаларды қорғау күні. Оны өткізу жөнінде шешім 1949 жылы Парижде Халықаралық демократиялық әйелдер федерациясының арнайы сессиясында қабылданған.
Біріккен ұлттар ұйымы игі бастаманы дер кезінде қолдап, балалардың өмірін, құқығын, денсаулығын қорғауды өз қызметінің басты бағыттарының біріне айналдырды.
Осылайша, бұл мереке 1950 жылы әлемде алғаш рет аталып өтті. Азаматтық қоғамның қалыптасуы жеделдеген сайын бала құқығын қорғауға деген жауапкершілік, қамқорлық артып келеді. Қазір елде Бала құқықтары жөніндегі уәкіл жұмыс істейді. Мемлекет бүлдіршіндердің тұлғалық дамуына ерекше басымдық беріп отыр. Балаларға арналған ұлттық жобалар, инклюзивті білім беру жүйесі, қауіпсіз орта құру сынды бастамалар – соның дәлелі.
