Фото: gov.kz
Қазақстан Сыртқы істер министрлігі Сауд Арабиясының азаматтық инфрақұрылым нысандарына жасалған шабуылдарға қатысты елдің ұстанымын жариялады.
Бұл туралы Qazaqtoday.info сайты хабарлайды.
Хусит жасақтарының Сауд Арабиясындағы азаматтық нысандарға жасаған әрі адам шығынына әкеп соққан шабуылдарын ведомство қатаң айыптады.
«Мұндай шабуылдарға гуманитарлық тұрғыдан жол беруге болмайды. Олар халықаралық құқық нормаларын бұзады. Бұл әрекеттер Йемендегі ахуалды тұрақтандыру жөніндегі күш-жігерге нұқсан келтіріп, қақтығысты саяси жолмен реттеуге кедергі келтіреді», — деп жазылған хабарламада.
Министрлік шабуылдарды дереу тоқтатуға және дағдарысты тек саяси-дипломатиялық құралдар арқылы шешуге шақырды.
Қазақстан Сауд Арабиясы Корольдігімен ынтымақтастық танытып, оның БҰҰ Жарғысына сәйкес өз егемендігі мен қауіпсіздігін қорғауға құқылы екенін растайды, дейді ведомствода.
Еске салайық, бір күн бұрын Эр-Риядтағы әуежайға шабуыл жасалып, салдарынан 12 адам қаза тапты және 300-ден астам адам жарақат алды.
Мақаланы бағалаңыз 👇
Дереккөз: Qazaq Today · Дана Нартаева
