Абай облысында әскерде үздік болған 30-дан астам сарбаз грант иегері атанған.
Қазір олар Семейдегі жоғарғы оқу орындарында білім алып жатыр. Арнайы бағдарлама аясында әскерде борышын өтеп келгендер тест тапсырмастан ақылы бөлімге қабылдана алады. Республика бойынша әскерге жыл сайын 40 мыңға жуық жас шақырылады. Оларға шамамен 2 мыңнан астам грант бөлінеді.
Дмитрий Азимжанов 2022 жылы Шымкенттегі 6506 әскери бөлімінде байланысшы болып қызмет атқарды. Әскери дайындықпен қатар Морзе әліппесін меңгерген. Радиостанциялар мен байланыс техникасымен жұмысты жетік игерді. Үздіктер қатарынан көрініп, университетке грант жеңіп алды.
Дмитрий Азимжанов, студент:
- Маған оқу грантына іліккенімді алдын ала хабарлаған. Бұл жаңалықты естігенде қатты қуандым. Әскери қызмет мерзімі аяқталған соң қай жоғары оқу орнына түсе алатынымыз жайлы айтып, бәрін түсіндіріп берді.
Роман Пономарёв пен Данила Жигаревтің тәртібі мен дайындығы талайдан оза шауып, жоғары оқу орнына берілетін мемлекеттік грантты жеңіп алған. Қазір үшеуі бір топта оқиды. Болашақ IT мамандары қазірдің өзінде стартап жобаларын әзірлеп, қоғамдық шараларға белсенді араласып жүр.
Роман Пономарёв, студент:
- Командирлердің қолдауы мен үшін маңызды болды. Тәртіпке сай қызмет етіп, өз ісіңе жауапкершілікпен қарап жоғары көрсеткішке жетуге болады деп ойлаймын.
Данила Жигарев, студент:
- Әуел бастан ЖОО түсуді армандадым. Бірақ әскерге барып келейін деп шештім. Оқу грантын әскерде жүріп-ақ аламын деп ойлағаным жоқ. Бұл мен үшін тосын жаңалық болды.
Абай облысында әскер қатарында үздік нәтиже көрсеткен 30-дан астам сарбаз грант иегері атанып, білім алады. Қазір әскерге шақырудың күзгі науқаны жалғасып жатыр. Биыл 1300-ден астам адамды әскер қатарына қосу жоспарланған.
Руслан Омаров, Қорғаныс істері жөніндегі департамент бастығы:
- Бұл грантпен оқу дегеніміз оқу бітіргеннен кейін үш жыл бойы бір жерде белгіленген тәртіппен жұмыс істеу міндеттілігі бар бұл азаматтарымызда. Осы грантпен оқып шыққан азаматтарымыз мерзімді әскери қызметке баратын болса, осы өтеме мерзімі үш жылдық жойылады.
Рүстем Қайратұлы, тілші:
- Жұмыс орнынан әскер қатарына кеткендердің орны бір жыл бойы сақталады. Несиелері болса бір жылға шегеріледі. Қазір тегін оқуға түскен жастар ел дамуына үлес қосуды мақсат еткен. Қорғаныс саласындағы бұл бастама мыңдаған жастың білімге құштарлығын ашып, жаңа мүмкіндіктерге бағыттап отыр.
Рүстем Қайратұлы, Мәди Базарбеков
