Президент тапсырмасына және Үкімет қаулысына сәйкес Ауғанстанның жойқын жер сілкінісінен зардап шеккен тұрғындарын қолдау мақсатында гуманитарлық көмек жөнелтілді, деп жазады Egemen.kz.
Мемлекеттік материалдық резервтен қажетті дәрі-дәрмектер, медициналық құралдар, төсек-жабдықтар, шатырлар және өзге де бірінші кезектегі қажетті заттар бөлінді. Сонымен қатар Денсаулық сақтау министрлігі зардап шеккендерге білікті көмек көрсету үшін медициналық қызметкерлер тобын жасақтап жөнелтті.
Төтенше жағдайлар министрлігінің баспасөз қызметінің мәлімдеуінше, гуманитарлық жүктің құрамына жалпы салмағы 18 тонна болатын 34 атау енгізілді. Жүк еліміздің Қорғаныс министрлігінің ұшағымен жеткізіліп, гуманитарлық көмек ауған тарапына табысталды.
ТЖМ әскери бөлімінің қызметкерлері мен әскери қызметшілері тиеу және түсіру жұмыстарын жүргізіп, жүктің жедел дайындалуы мен жөнелтілуін қамтамасыз етті.
Гуманитарлық көмек «KazAID» Қазақстандық халықаралық даму агенттігінің қолдауымен көрсетілді.
