Ресейдің Санкт-Петербург қаласында он бірінші Халықаралық біріккен мәдениеттер форумы өтіп жатыр. Жиынға Мәдениет және ақпарат министрі Аида Балаева бастаған қазақстандық делегация да қатысты. Форумда мәдени мұраны сақтау, цифрлық технологиялардың рөлі, креативті экономиканы дамытуды сынды тақырыптар қозғалды.
Аида Балаева, ҚР Мәдениет және ақпарат министрі:
- Бүгінгі шараның тақырыбы – «Мәдениетке оралу — жаңа мүмкіндіктер». Мәдениет тек сахна, мұражай немесе концерт залы емес екені белгілі. Бұл рухани бірліктің кеңістігі, өнер ғибадатханасы, жаратылыс пен шабыттың қайнар көзі.
Шара – ашық диалог жүргізуге, тәжірибе алмасуға және жаңа идеяларды жүзеге асыруға арналған бірегей алаң. Аида Балаева форум аясында ресейлік әріптесі Ольга Любимовамен кездесіп, ынтымақты нығайту жолдарын пысықтады. Одан бөлек, ресейлік тарапқа мәдени бастамаларды тұрақты қолдап келе жатқаны үшін алғыс білдірді.
Кездесу қорытындысы бойынша екі ел министрлері әріптестікті нығайтуға, тәжірибелер алмасып, бірлескен жобаларды іске асыруға және мәдениет мекемелері арасындағы байланыстарды дамытуға ниетті екендерін растады. Қазанда өтетін Ресейдегі Қазақстан мәдениеті күндерінің бағдарламасы мазмұнды болғалы тұр.
Жаңа Третьяков галереясында Әбілхан Қастеев атындағы Мемлекеттік өнер музейінің коллекциясынан алынған шедеврлер көрмесі ашылады. Кіші театр сахнасында заманауи философиялық драма «Парасат майданы» ұсынылады. Қазақстан мәдениеті күндерінің қорытынды іс-шарасы отандық өнерпаздардың қатысуымен өтетін Гала-концертпен аяқталады.
