Семейде республикалық «Абай Quiz» зияткерлік ойыны өтті.
Шараға Қазақстанның түкпір-түкпірінен келген 180 команда қатысты. Олардың қатарында абайтанушылар, студенттер, филологтар мен ұлы ақынның шығармашылығына қызығатын жастар бар. Ойынға барлығы 1080 адам жиналған. Бұл еліміздегі квиз форматындағы ойындар арасында бұрын-соңды болмаған көрсеткіш, дейді ұйымдастырушылар. Енді бұл нәтижені Қазақстан рекордтар кітабына енгізуді жоспарлап отыр. Жалпы сайыс 7 тақырыптық айналымнан тұрды. Әр айналымда 8 сұрақтан, барлығы 56 сұрақ қойылды. Жеңімпаздарға арналған жүлде қоры 4 миллион 700 мың теңге.
Қуаныш Молдақашев, ұйымдастырушы:
- Сұрақтардың басым бөлігі Абай Құнанбайұлының өмірі, шығармашылығына арналған. Және де Абай Құнанбайұлына қатысты деректерден бүгінгі сұрақтар жасалды. Жобаның ең негізгі мақсаты ақын мұрасын осы 180 жылдық аясында дәріптеу, шығармашылығымен таныстыру.
Диас Серікбеков, ойынға қатысушы:
- Ұйымдастыру деңгейі өте жоғары. Сұрақтары да біраз қиындық тудырады. Әрине жауапты беріп жатырмыз. Жартысынан көбі дұрыс жауап бердік деп ойлаймыз.
