Өзбекстанда мемлекеттік қызметшілер салауатты өмір салтын ұстануға міндеттеледі. Дене шынықтыру, үнемі ширақ жүріп, дұрыс тамақтану олар үшін күнделікті дағдыға айналуы тиіс.
Көрші ел мемлекеттік қызметтің жаңа моделін енгізуге кірісті. Бұл заманауи тәсілдерге негізделген жүйе болмақ. Мақсат – кәсіби әрі мінсіз шенеуніктер корпусын қалыптастыру. Бұған қатысты ел президентінің арнайы жарлығы шықты. Кадрларды іріктеу енді толығымен сандық жүйеге көшеді. Барлық бос орындар арнайы онлайн платформада жарияланады. Тұрақты түрде аттестаттау жүргізіледі. Мамандардың қызметіне цифрлық мониторинг жасалады. Қызметкерлер кәсіби қайта даярлаудан өтуге міндеттеледі.
Виктор Кесслер, сарапшы, GIZ халықаралық ынтымақтастық қоғамы «Тиімді басқару» жобасының жетекшісі:
Осы арқылы жұмысына тиянақты, адал әрі кәсіби мемлекеттік қызметшілерді іріктеу жолға қойылады. Біліктілікті арттыру стандарттарын жетілдіреміз. Жалпы алғанда мұндай жаңашылдық тұрғындардың мемлекеттік институттарға деген сенімін нығайта түспек. Ең бастысы халыққа көрсетілетін қызметтің сапасы артады.
Базаркүл Отыншиева
