Астанада Орталық Азия мен Қытайдың медиафорумы басталды, деп хабарлайды 24KZ. Шараға дәл осы геосаяси кеңістіктегі ақпарат ұйымдары қатысып, өзара пікір алмасты. Сонымен қатар «Бір белдеу, бір жол» жобасы бойынша баспасөз туры салтанатты түрде бастау алды.

Сауатты әрі байыпты ақпараттық саясат ынтымағымызды күшейтіп, орнықты дамуымызға септігін тигізеді. Қасым-Жомарт Тоқаевтың медиафорумға арналған құттықтау сөзінде осылай делінген. Құттықтау сөзді Президенттің ішкі саясат мәселелері және коммуникациялар жөніндегі көмекшісі Арман Қырықбаев оқып берді.

Арман Қырықбаев, ҚР Президентінің ішкі саясат мәселелері және коммуникациялар жөніндегі көмекшісі:

- Қазақстан Қытай Халық Республикасымен достық қатынасты дамытуға айрықша мән береді. Ұдайы өсіп-өркендеуге, тиімді диалог құруға ұмтылған елдеріміздің мүддесі бір, мақсаты ортақ. Халықтардың бір-бірін жақын танып білуі және жаһандық сын-қатерлердің шешімін бірлесіп іздеу өте маңызды. Бұған жауапкершілігі мол медиа саласы өкілдері зор үлес қоса алады. Мұндай алқалы жиындар Еуразия кеңістігінде тұрақтылық, ашықтық және жасампаздық қағидаттарын орнықтыра түсуге ықпал етеді. Форумда осы аймақтағы барлық елдің игілігіне қызмет ететін тың идеялар мен парасатты пікірлер айтылады деп сенемін.

Медиафорумды Президенттің телерадиокешені мен қытайлық «Жэньминь Жибао» газеті ұйымдастырып отыр. Оған Орталық Азия мен Қытайдан 140 шақты медиа маманы қатысты. Жиында саяси сенімді нығайту, ортақ даму және аймақтық қауіпсіздік мәселелеріне басымдық берілді.

Нағашыбек Алдан, «Kazinform» халықаралық ақпарат агенттігі басқарушы директорының орынбасары:

- Біздің ТРК серіктес болғаны біз үшін жоғары мәртебе және біз барынша атсалысып жатырмыз. Жалпы алғанда соңғы кезде медиа саласында ынтымақтастық ұлғайып келеді. Қай бағытты алсаңыз да. Әсіресе қытайлық «Жэньминь Жибаомен» серіктестік тереңдеп келеді.

Мухомеджон Обидов, Ферғана облысы журналистер одағының төрағасы:

- Халық арасында және мемлекет басшылары арасында ғана емес, журналистер арасында да халықаралық қарым-қатынас болу қажет. Медиа саласының саяси ықпалы зор. Бұл бекітілген норма. БАҚ өкілдері әлемдік саяси ахуалды үнемі бақылауда ұстауы керек. Осындай медиа форумдар біз үшін өзара байланыс алаңына айналады.

Форум аясында «Жібек жолы әуені» бейнебаяны көрсетіліп, «Бір белдеу, бір жол» жобасы негізінде баспасөз туры салтанатты түрде ашылды.

Яхун Се, «Жэньминь Жибао» газетінің тілшісі:

- Орталық Азиядағы 5 ел мен Қытайдың БАҚ өкілдері осы жерде әріптестік байланыс орнатамыз. Ертеңнен бастап баспасөз туры аясында Қазақстан мен Қытайдың бірлескен жобаларын көзбен көреміз. Оның ішінде туризм, өнеркәсіп сияқты салалар бар. Астана, Алматы, Ақтау және Қарағандыны аралаймыз.

Ақпараттық технологияның дамуы медиа мамандарынан жаңашылдық талап етеді. Сондықтан дәл осы геосаси кеңістіктегі телеарналар, радио мен басылымдар өзара тәжірибе алмасуды жалғастырмақ.

Авторлары: Еркебұлан Смадияров, Абдулхамит Бөлекбаев