Астана қаласының әкімі Жеңіс Қасымбектің айтуынша, қазіргі таңда елорда алдында тұрған ең өзекті түйткіл – кептеліс. Қала басшысы мәслихат сессиясында оны шешу жолдарын атады, деп хабарлайды Egemen.kz.
Әкімнің сөзінше, соңғы күндері қалада қардың қалың түсуі, сонымен қатар бірқатар ірі қоғамдық іс-шаралардың өтуі жолдардағы жағдайды қиындатқан.
«Қар жауған күндері жағдай күрделенді, оған қоса 10-11 желтоқсанда қалада спорттық және басқа да шаралар өтті. Соның әсерінен жолдардағы жүктеме артты», деді Жеңіс Қасымбек.
Ол екі жыл бұрын елорда үшін су және жылумен қамту басты мәселе болғанын еске салды. Әкімдіктің мәліметінше, бұл бағыттағы жұмыстар толық орындалған, қазір қалада аталған ресурстар бойынша тапшылық жоқ.
«Бүгінде бірінші мәселеміз – көлік қозғалысы. Жақын айларда LRT-ны іске қосамыз. Қалада жаңа жолдар салынды. Келесі жылы Тәуелсіздік көшесін айтарлықтай кеңейтуді жоспарлап отырмыз. Есіл және Нұра аудандарынан көпірлерге бағытталған ағын қиындық тудырып отыр. Екі жаңа көпірдің жобасы әзірленуде», деді ол.
Жеңіс Қасымбек жолдағы жүктемеге жаңа жұмыс кестесінің де әсер еткенін атап өтті.
«Әкімдіктің таңғы сағат 7:30-да, ал мемлекеттік мекемелердің таңғы сағат 8:00-де жұмыс істей бастауы әсер етті. Таңғы 8-10 аралығында көшелер айтарлықтай босады. Дегенмен, қозғалыс енді 06:30-дан басталады. Соған қарамастан, жалпы жылжу жылдамдығы 15 пайызға артты», деді әкім.
Қала басшысы әкімдік тарапынан кептелісті азайтуға бағытталған нақты жоспарлар дайындалғанын жеткізді.
Еске сала кетейік, қазан айында журналистер Астана әкіміне жаңа жұмыс кестесіне қарамастан, жолдардағы кептелістің неге азаймағаны туралы сауал қойған еді. Сол кезде Қасымбек өзгерістер кезең-кезеңімен жүзеге асып жатқанын айтып, әкімдікке уақыт беруді сұраған.
Бұған дейін қала әкімі LRT-ның келесі бағыты Қосшыға қарай салынатынын айтқан еді. Әкімнің сөзінше, бүгінде Қосшыдан елордаға күн сайын 15-20 мың көлік қатынайды. Бұл қала көшелеріне елеулі жүктеме түсіріп отыр.
