Елде кейінгі бес жылда 12 мыңға жуық балабақша салынды. Бұл туралы Оқу-ағарту бірінші вице-министрі Майра Мелдебекова айтты. Қазір балабақшаларда бір миллионға жуық бала тәрбие алып жатыр.
Елдегі екі мен алты жас аралығындағы бүлдіршіндерді балабақшамен қамту деңгейі 95,9 пайызға жетті. Министрлік өкілдері өңірлерде жаңа балабақшалар ашу жұмысы жалғасатынын айтады.
Майра Мелдебекова, ҚР Оқу-ағарту бірінші вице-министрі:
- Өңірлерде жаңа орындарды ашу және оларды әрі қарай қаржыландыру үшін республикалық бюджеттен 2023 жылы 203 млрд теңге, 2024 жылы 226 млрд теңге, 2025 жылы 252 млрд теңге жалпы сипаттағы трансферттер бөлінді. 2023 жылдан Мемлекет басшысының тапсырмасына сәйкес халықтың әлеуметтік осал тобына жататын отбасы балаларын мектепке дейінгі ұйымдарда тегін тамақтандыру қамтамасыз етілді. Биылғы жылы мектепке дейінгі ұйымдарда 67 200 бала тегін тамақпен қамтылды.
