Алматыда кәмелетке толмаған жазасын өтеушілер жаңа ғимаратқа көшті. Райымбек даңғылындағы 1941-ші жылы салынған колония ескірді. Бұл елде 14 пен 18 жастағы сотталғандарға арналған жалғыз мекеме. Қазір 60 ер бала жазасын өтеп жатыр.
Жаңа нысан Түрксіб ауданында мемлекеттік-жекеменшік әріптестік аясында салынды. Ғимарат 200 орынға есептелген және халықаралық стандарттарға сай келеді. Ішінде мектеп, колледж, спорт алаңдары, медпункт және шеберханалар бар. Қылмыстық-атқару жүйесі департаменті өкілдерінің айтуынша, басты мақсат – сотталғандар жазасын өтеумен ғана шектелмейді. Шалыс басқан жасөспірімдерге білім беріп, жаңа өмір бастауға мүмкіндік жасалады.
Ерлан Ұзақов, Алматы қаласы бойынша қылмыстық атқару жүйесі департаментінің бастығы:
- Басты мақсат – түзету ғана емес, болашақтарын жарқын ету. Сондықтан біз ұстау жағдайларын қамтамасыз етумен ғана шектелмейміз. Біздің негізгі миссиямыз қайталанатын құқық бұзушылықтардың алдын алу, жасөспірімдерге білім, мамандық және қоғамға дайындық пен ынталы түрде оралуға нақты міндетті беру.
