Ұлытау облысында Қазақстан бойынша алғаш рет Әуе құтқару жасағының салтанатты ашылуы өтті. Сонымен қатар облыс орталығы – Жезқазған қаласында жаңа өрт сөндіру бөлімшесі іске қосылды. Айрықша маңызы бар бұл күні төтенше жағдайлар қызметкерлеріне жаңа арнайы техниканың кілттері және бірқатар сала қызметкеріне қызметтік пәтерлердің кілттері табыс етілді, деп хабарлайды Жезқазған әкімдігі.
Іс-шараға Қазақстан Төтенше жағдайлар министрі Шыңғыс Арынов, сондай-ақ "Қазақмыс" корпорациясының басқарма төрағасы Нұрахмет Нұриев арнайы келіп, өңірде төтенше жағдайларға жедел ден қою жүйесін нығайту бағытындағы жұмыстардың жоғары деңгейде жүргізіліп жатқанын атап өтті.
Ұлытау облысының әкімі Дастан Рыспеков құттықтау сөзінде бұл нысандардың ашылуы өңір қауіпсіздігін қамтамасыз етудегі маңызды қадам екенін айтты.
"Мемлекет басшысы өңірлердің қауіпсіздігін күшейтуге ерекше көңіл бөліп келеді. Бүгін ашылған Әуе құтқару жасағы мен жаңа өрт сөндіру бөлімшесі – осы бағыттағы жүйелі жұмыстың нақты нәтижесі. Бұл – біздің өңір тұрғындарының қауіпсіздігін қамтамасыз етуге арналған маңызды инвестиция", – деді өңір басшысы.
Өз кезегінде ТЖ министрі Шыңғыс Арынов әуе құтқару саласының инфрақұрылымын дамыту жұмыстары жалғасатынын атап өтті.
"Осындай үлгідегі тікұшақ ангарлары еліміздің бірнеше өңірінде кезең-кезеңімен ашылады. Ал алғашқы нысанның Ұлытау облысында іске қосылуы – орталық өңірге көрсетілген қолдаудың айқын көрінісі және республикалық деңгейдегі төтенше жағдайларға қарсы дайындықты нығайтудың нақты қадамы", – деді министр.
Салтанатты іс-шара барысында төтенше жағдайлар қызметкерлеріне қызметтік пәтерлердің кілттері табыс етіліп, өңірдің белсенді азаматтары арнайы төсбелгілермен және алғысхаттармен марапатталды.
Айта кетейік, биыл Қазақстан Төтенше жағдайлар министрлігі Ұлытау облысына заманауи жабдықталған тікұшақ жеткізген еді. Бұл өңірдің табиғи және техногендік сипаттағы төтенше жағдайларға жедел ден қою мүмкіндігін айтарлықтай арттырды.
Мәтіннен қате тапсаңыз, бізге жазыңыз
