Маңғыстауда киелі орындардың күтіміне жауапты коммуналдық мекеме құру туралы бастама көтерілді.
Бұл жайында Ақтауда өткен халықаралық жиында айтылды. Басқосу «Түркі халықтарының өркениеті және оның әлемдік мәдениет тарихындағы орны» тақырыбымен өтті. Оған Түркия, Өзбекстан, Қырғызстан, Мажарстан және Түрікменстаннан келген ғалымдар қатысты. Меймандар Бекет ата жерасты мешіті, Шақпақ ата қорымы секілді сакральды жерлермен танысып, киелі орындар туралы ойын ғылыми жоба ретінде әлемге дәріптемек. Түркі елдерінің мәдени астанасы атанған Ақтауға биыл алыс-жақын шетелден туристер көп келіп жатыр. Оларға жоғары деңгейде қызмет көрсетіп, әрі қасиетті орындарға зиян келмеуін бақылайтын ұйым болуы тиіс — дейді қатысушылар.
Дархан Қыдырәлі, ҚР Парламенті Сенатының депутаты:
- Әр түркі кезеңдеріне қатысты мындағы қалалардың орындарын анықтау, көне Оғыз таңбаларын айқындау және ең бастысы Қараман ата, Шақпақ ата, Бекет ата жанындағы таңбаларды, ескерткіштерді қорғау-сақтау. Бұл үшін өте кешенді жұмыс керек. Оған бір облыстағы тарихи-мәдени ескерткіштерді сақтау жөніндегі қызметкерлер жетпейді. Қазақстанда 25 мыңға жуық ескерткіш болса, соның тең жартысы Маңғыстауда екен. 30-ға жуық адам жетпейді. Сондықтан біздің ойымызша, бұл жерге «Сұлтан қорық» мұражайы сияқты арнайы мекеме керек.
