Бүгін Мемлекет басшысы Integra Construction KZ бенефициар меншік иесін қабылдады. Шахмұрат Мүтәліп ірі инфрақұрылымдық жобаларды жүзеге асыру барысы мен өндірістік, тұрғын үй және әлеуметтік нысандарды салу жөнінде баяндады. Сондай-ақ Президентке компанияның құрылыс пен темір жол салаларында іске асырып жатқан халықаралық бастамалары туралы ақпарат берілді.
Мемлекет басшысы ел экономикасы үшін мәні зор жобаларды сапалы әрі уақтылы орындаудың маңызды екенін атап өтті. Integra Construction KZ бірқатар әлеуметтік жобаны қолға алған. Мәселен, компания Алматы қаласындағы «Бағанашыл» балалар үйін 5 млрд теңге жеке қаражаты есебінен қайта жөндей бастаған. Сонымен қатар Шахмұрат Мүтәліп Қазақстан бок федерациясының Президенті ретінде ұлттық құраманың нәтижелері мен 2028 жылғы Олимпиада ойындарына дайындық жоспары жайында мәлімет берді.
