Ұлытау облысында да жіті респираторлық вирустық инфекциясы өршіп тұр. Тек соңғы бір аптаның өзінде 3400-ден астам сырқаттанушы тіркелді. Оның 50 пайызы мектеп жасындағы балалар.
Күн сайын дәрігер көмегіне жүгінетін адам саны да екі есе артқан. Осыған байланысты Жезқазғандағы үш мектептің оқушылары ішінара онлайн оқу форматына көшірілді. Қазір облыстағы инфекциялық ауруханалар 94 процентке толған. Онда негізінен бір жасқа дейінгі нәрестелер мен жүкті әйелдер жатқызылған. Ал, амбулаторлық ем қабылдауға болатын науқастар үйлеріне жіберіледі. Денсаулық сақтау басқармасындағылар алдағы күндері инфекциялық ауруханаларда қажеттілікке қарай қосымша орындар жасақталатынын айтты.
Нұрбол Жолдыбаев, Денсаулық сақтау басқармасының бөлім басшысы:
- 207 науқас жатыр бізде жіті респираторлық инфекциямен. Оның 132-сі инфекциямен және жетеуі пневмониямен жатыр. Қаралуға келген адамдардың саны көбейіп кетті, соған байланысты фильтрдегі медициналық қызметкерлердің санын көбейттік және де төртінші бригаданы кешкі сегізге дейін күшейтіп жатырмыз.
