Алматы облысында соңғы қоңырау кезінде оқушының қаза табуына қатысты қанды оқиғаға Ішкі істер министрінің орынбасары Санжар Әділов пікір білдірді, — деп хабарлайды Massaget.kz тілшісі.
Мәжіліс кулуарында Әділовтің айтуынша, күдікті кәмелетке толмаған жасөспірім екі айға қамауға алынған.
"Қасақана адам өлтіру дерегі бойынша қылмыстық іс қозғалды. Тергеу тобы жұмыс істеп жатыр. Қазіргі таңда тергеу әрекеттері белсенді жүргізілуде. Мектеп директоры қызметінен босатылды, оқу ісінің меңгерушісі мен екі сынып жетекшісіне қатаң шара қолданылды", – деді вице-министр.
Журналистер күдіктінің өз әрекетін түсіндірген-түсіндірмегенін сұрады.
"Барлық мән-жай тергеу барысында анықталады. Қазір тергеу енді ғана басталды", – деп жауап берді Әділов.
Алматы облысындағы сұмдық оқиға
Қайғылы оқиға соңғы қоңыраудан кейін болған. Қырғауылды ауылындағы орта мектептің бітіруші түлектері мерекені атап өту үшін Долан ауылында жекеменшік үй жалдап, кеш ұйымдастырған. Мектеп әкімшілігінің айтуынша, кешке екі бітіруші сыныптың оқушылары жиналған.
Трагедия кеш басталғаннан бірнеше сағат өткен соң орын алған. Қаза тапқан Алиби есімді жасөспірімнің туыстарының айтуынша, кештің соңына қарай бір бозбала қолына кәуапқа арналған темір шанышқыны алып, басқаларды қорқыта бастаған. Алиби оны сабырға шақырмақ болғанда, шампур жүрек тұсына тиген. Жасөспірім оқиға орнында тілге келместен көз жұмған.
Алиби оқыған мектеп директорының сөзінше, мектеп әкімшілігі бұл кеш туралы мүлде хабарсыз болған. Соңғы қоңырау алдында ата-аналардан балалардың мектептен тыс жерде тойламайтыны туралы қолхат алынған.
Күдіктінің ата-анасы бала тәрбиелеудегі міндеттерін дұрыс орындамағаны үшін әкімшілік жауапкершілікке тартылды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
