Сенат төрағасы Мәулен Әшімбаев Қазақстан Республикасына алғаш рет ресми сапармен келген Германия Федеративтік Республикасы Бундесратының президенті Анке Релингермен кездесті, деп хабарлайды 24KZ. Кездесу барысында тараптар инвестициялық ынтымақтастық және парламентаралық өзара іс-қимылды одан әрі дамыту мәселелерін талқылады.
Сенат спикері дипломатиялық қарым-қатынас орнағалы бері Қазақстан мен Германия арасында сенімді саяси диалог жолға қойылғанын атап өтті. Ал Анке Релингер Қазақстандағы әлеуметтік-экономикалық және саяси өзгерістерге жоғары баға беріп, екі елдің ынтымақтастығы одан әрі нығая түсетініне сенім білдірді. Бүгінде қос мемлекет арасында сауда-экономикалық және инвестициялық ынтымақтастық пен мәдени-гуманитарлық байланыстар қарқынды түрде дамып келеді.
Мәулен Әшімбаев, ҚР Парламенті Сенатының төрағасы:
- Президентіміз Қасым-Жомарт Кемелұлы Тоқаев Германия мемлекетімен байланысты нығайтуға көп көңіл бөледі. Бұған соңғы үш жылда Германия Федеративтік Республикасының президенті Франк-Вальтер Штайнмайердің Қазақстанға жасаған сапарлары мен біздің мемлекет басшысының Германияға сапары, сондай-ақ Германияның Федералды Канцлері Олаф Шольцтің Қазақстанға сапары дәлел бола алады. Парламент Сенаты тарапынан заңдық тұрғыдан барлық көмекті көрсетуге дайынбыз және алға қойған келісімдердің тиімді түрде жүзеге асуына мүдделіміз.
