Әлеуметтік желілерде Мәжіліс депутаты Темір Қырықбаевқа қатысты дау шықты. Желі қолданушылары оны Түркістан облысы мәслихатындағы мандатын " тоқалына берді және некесіз туған баласын жасырды" деп айыптады. Бұл ақпаратқа депутаттың өзі пікір білдірді, — деп хабарлайды Massaget.kz тілшісі.
Кей жазбаларда мәжілісмен Түркістан облысы мәслихатының депутатына орнын "сыйлағаны" айтылған. Темір Қырықбаевтың айтуынша, өзі де бұл ақпаратты естіген.
"Бұл ақылға сыймайды. Өзі сайланған, халық сайлаған. Өңірдің сайлау комиссиясы бар, сол жақтан сұрасаңыздар болады. Халыққа үгіт-насихат жасап, "депутат болсын" деп те айтпағанмын", — деді ол.
Ал жеке қарым-қатынасы туралы сұраққа Темір Қырықбаев жауап беруден бас тартты.
"Ол — менің жеке өмірім, жеке өмірім болғаннан кейін отбасылық құндылықты сақтау үшін әрі қарай айта алмаймын. Ал бала бойынша балам емес деп еш жерде айтпағанмын. Ол — менің ұлым, өзімнің атымды бергенмін, Алланың алдында, адамның алдында да жасырмаймын", — деді ол.
Аптаның басты оқиғалары мен пайдалы видеоларды көру үшін YouTube арнамызға жазылыңыз
