Премьер-министр Олжас Бектенов жаһандық инвестициялар жөніндегі VIII қазақстандық дөңгелек үстел қатысушыларымен кездесу өткізді.
Президент атап өткен жаңа инвестициялық циклді іске қосу міндеттері аясында үкімет тарапынан бүгінде шетелдік инвестиция көлемін ұлғайту мақсатында халықаралық ұйымдармен жүйелі жұмыстар жүргізілуде. Сәйкесінше, агроөнеркәсіп кешені, энергетика, коммуналдық секторлар және басқа да салалардағы өнімді жобалар бойынша инвестициялық бағыттарды ұлғайту назарға алынған. Мәселен, Еуропалық қайта құру және даму банкінің вице-президенті Маттео Патронемен банктің Қазақстан аумағында инфрақұрылымдық жобаларға қатысу мәселелері талқыланып, шағын және орта бизнесті дамыту бағыттарына да баса мән берілді. Ал PepsiCo компаниясының Ресей, Беларусь, Кавказ және Орталық Азия аймағы бойынша президенті Дэвид Манзинимен өткен басқосуда Үкімет басшысы Алматы облысындағы тұзды тіскебасарлар шығаратын зауыт жобасының іске асу барысын талқылады. Нәтижесінде, жергілікті әкімдіктерге тиісті мемлекеттік органдармен бірлесіп, инвестициялық жобаны қажетті инфрақұрылымдық шешімдермен қамтамасыз ету және одан әрі жәрдемдесу міндеті жүктелді. Ал Fufeng Group директорлар кеңесінің төрағасымен болған іскерлік кездесуде Жамбыл облысында жүгеріні терең өңдеу бойынша өнеркәсіптік парк жобасын жүзеге асыру мәселесі қаралды. Кездесулер қорытындысында, Бектенов Қазақстан Үкіметі инвесторларға жан-жақты қолдау көрсетіп, бизнес-жобаларды толық қолдауға баса назар аудара отырып, қолайлы инвестициялық ахуалды қалыптастыруды жалғастыратынын атап өтті.
