Алдағы 2024–2025 жылғы жылыту маусымына дайындық аясында Ақмола облысында 27,8 млрд теңгеден астам қаражат қарастырылған. Бұл туралы Үкімет отырысында өңір әкімі Марат Ахметжанов мәлімдеді, деп хабарлайды Egemen.kz.
Ақмола облысында алдағы жылыту маусымына жоспарлы түрде дайындық жүріп жатыр. Биыл бұл мақсатқа 27,8 млрд теңге көлемінде қаржы қарастырылған. Аталған қаражаттың 11 млрд теңгеден астамы жөндеу жұмыстарына, 6 млрд теңгеден астамы энергия ресурстарын сатып алуға, ал 10 млрд теңгеден астамы орталық қазандықтарды қайта жаңғырту мен жылу желілерін салуға бағытталады.
Өңір басшысы Марат Ахметжановтың айтуынша, 2023–2024 жылдары облыста ұзындығы 19 шақырымнан асатын жылу желілері жөнделген. Бұл жұмыстарға 6,2 млрд теңге бөлініп, нәтижесінде тозу деңгейі 80,7%-дан 75%-ға дейін төмендетілген. Өткен жылыту маусымы ақаусыз өткен.
Биыл Степногорск қаласында тағы 18 шақырымнан астам жылу желілерін жаңарту жоспарланып отыр. Бұл көрсеткішті 65%-ға дейін төмендетуге мүмкіндік береді. Сонымен қатар, «Энергетикалық және коммуналдық секторларды жаңғырту» ұлттық жобасы аясында екінші деңгейлі банктердің қатысуымен 4 шақырым магистральді желіні реконструкциялау мәселесі қарастырылуда.
Марат Ахметжанов бұл шаралардың барлығы жылыту маусымының үздіксіз әрі сапалы өтуін қамтамасыз ететінін атап өтті.
Дамира Төлеген
ЕҰУ студенті
