Қарағандыда Astana Vision офтальмологиялық клиникалар желісінің жаңа орталығы ашылды .
Енді өңір тұрғындары көзін емдету үшін, басқа қалаларға бармайтын болды. Жаңа орталық халықаралық стандарттарға сай жабдықталған. Білікті мамандар диагностикадан бастап, күрделі операцияларға дейін жасайды. Мұнда міндетті әлеуметтік медициналық сақтандыру жүйесі негізінде тегін ем алуға болады.
ASTANA VISION орталығының Қарағандыдағы ғимараты кәсіпкерлікті дамыту үлттық жобасы аясында салынды. Клиникаға озық үлгідегі құрал-жабдықтар қойылған.
Ораз Тәуірбеков, облыс әкімінің орынбасары:
- Жалпы бұл жобаның құны 3,2 миллиард теңгеден асып кетсе, оның 45 пайызы мемлекеттік қолдаумен. Егер офтальмологиялық қызметтер бойынша айтатын болсақ, біздің аймақта 30 пайыз қызметтер осы клиникаға жатады.
ASTANA VISION — Орталық Азиядағы көз ауруларын емдейтін ең ірі клиникалар желісінің бірі. Медициналық мекеме 2000 жылы құрылған. Бүгінде Қазақстанның 14 қаласында заманауи филиалы бар.
Владимир Ким, Astana Vision көз клиникалары желісінің бас директоры:
- Біздің құрылғанымызға 25 жылдан асты. Қарағанды елдегі ірі қалалардың бірі. Аймақ тұрғындарына заманауи офтальмологиялық қызмет көрсетуді дамытуды қолға алдық. Сол үшін қомақты инвестиция құйып отырмыз.
Клиникада офтальмологиялық қызметтің ең күрделі операциялары жасалады. Жыл сайын Қазақстан мен шетелдерден 100 мыңнан астам пациент ем қабылдайды. Аймақтағы миллионнан астам тұрғынға міндетті медициналық сақтандыру жүйесі негізінде қызмет көрсетеді.
Дина Көпбаева, ASTANA VISION көз клиникалары желісінің офтальмолог дәрігері:
- Біздің клиникада күрделі операциялардың бірі витреоретинальная хирургия. Ол көздің ішкі қабатының ақауларын емдеуге байланысты. Ең заманауи лазерлік операциялар жасалады.
Клиникада көп жылдық тәжірибесі бар үздік мамандар жұмыс істейді. Жоғары білікті офтальмологтар заманауи диагностикалық және емдеу әдістерін қолданып, үнемі озық технологияларды меңгеріп отырады.
Руслан Нұрланұлы, Сайлау Игіліков, Аман Хамит
