Әлеуметтік желіде моланың қасында қамшымен ем жүргізіп жатқан екі әйелдің видеосы тарап, қоғамның қатты талқысына түсті . Кадрларда бірі қамшы ұстап, екіншісінің арқа мен иық тұсына тигізіп ем жасап тұрғаны байқалады. Видеоның сипаттамасында «емдеу қамшымен» деген жазу қалдырылған, деп хабарлайды Skifnews.kz ақпарат порталы.
Алайда қолданушылардың басым бөлігі бұл әрекеттің дін мен салтқа қайшы екенін айтып, сын пікір білдіріп жатыр.
Пікір қалдырғандардың бірі: «Әулие барып істегені дұрыс емес», – десе, екіншісі: «Қорымда не жеп жүр, өлілерге тыныштық бермей», – деп жазған. Тағы бір қолданушы: «Разве можно проводить лечение у могил? Первый раз такое вижу», – деп таңданысын білдірді.
Көпшілік бұны дін мен халықтық нанымның ара-жігін шатастыру, сондай-ақ қорымдардың тыныштығын бұзу деп бағалауда. «АстафирАллах» деп жазғандар да аз емес.
Дінтанушылардың айтуынша, ем жүргізуді немесе «қамшымен ұру» рәсімін қасиетті жерлерде жасау – ислам қағидаларына қайшы. Қорым – дұға оқу мен марқұмдарды еске алатын орын, ал емдеу рәсімдері басқа ортада өтуі тиіс.
Мұндай көріністер соңғы жылдары жиілеп кетті: кей адамдар емші, экстрасенс немесе «рухани ұстаз» атын жамылып, халықтың сенімін пайдаланады. Ал мамандар бұл құбылысты діни сауатсыздық пен бақылаусыз «халықтық емдеу» салдарының бірі деп отыр.
