Шымкентте тұрғындардың өмір сүру сапасын арттыру , қауіпсіздік деңгейін күшейту және экологиялық тұрақтылықты қамтамасыз ету бағытында жүйелі жұмыстар жүргізіліп жатыр, — деп хабарлайды Шымкент әкімдігі.
Қала әкімдігі мен тиісті басқармалар тарапынан қоғамдық көлік қызметін жетілдіру, тұрмыстық қауіпсіздік мәдениетін дамыту, экологиялық ахуалды жақсарту және құқық бұзушылықтардың алдын алу шаралары тұрақты түрде қолға алынуда.
Қоғамдық көлік қызметін жақсарту
Соңғы уақытта әлеуметтік желілерде қаладағы қоғамдық көліктердің қозғалысына қатысты көтерілген мәселелер әкімдік назарынан тыс қалмады. Әсіресе №52 бағыттағы автобустың жүктемесіне қатысты шағымдар бойынша нақты шаралар қабылданды. Бүгінде бұл бағытта 18 автобус жұмыс күндері 10–15 минуттық интервалмен, ал демалыс күндері 16 автобус 15–20 минуттық аралықпен қызмет көрсетеді.
Әкімдік мәліметінше, маршруттың қозғалыс сызбасы қайта қаралып, бұрынғы соңғы аялдамасы "ЦУМ"-нан Т. Айбергенов көшесіне дейін ұзартылды. Бұл шешім тұрғындардың діттеген жеріне ыңғайлы жетуіне және ауысып міну қажеттілігін азайтуға мүмкіндік берді.
Сондай-ақ қаладағы 300 мың оқушының тек 30 647-і ғана жол жүру картасын рәсімдеген. Сол себепті ата-аналарға балаларының электронды карта арқылы әр сапарын тіркеуін қадағалау ұсынылады. Бұл қоғамдық көлік сапасын арттырып, бағыттағы автобустар санын көбейтуге ықпал етеді.
Айта кетерлігі, оқушыларға арналған жол жүру картасы енді jenil.avtobys.kz сайты арқылы онлайн рәсімделеді. Бұл қызмет тегін әрі ыңғайлы.
Экологиялық қауіптің алдын алу және табиғатты қорғау шаралары
2025 жылдың 8 қазанында Төлеметов пен Бәйтереков көшелерінің қиылысында жолға нефтешлам төгілу фактісі орын алған еді. Тиісті қызметтер жедел әрекет етіп, төгілген қалдықтар толықтай тазартылып, аумақ қалпына келтірілді. Зертханалық талдау нәтижесінде ауа сапасы нормадан аспағаны анықталды. Бұл жедел шаралардың арқасында экологиялық қауіптің алдын алу мүмкін болды.
Қалалық әкімдік пен жауапты қызметтер мұндай жағдайлардың қайталанбауы үшін тасымалдаушы компаниялармен түсіндіру және профилактикалық жұмыстарды күшейтті.
Жасыл белдеу мен экопарктерді дамыту
Қала аумағында экологиялық мәдениетті арттыру бағытында көгалдандыру мен абаттандыру жұмыстары қарқынды жүргізілуде. Абай ауданында бұрынғы қоқыс полигонының орнында жаңа "Экопарк" саябағының құрылысы басталды. Жоба аясында 5 000-нан астам ағаш көшеті отырғызылып, автоматты суғару жүйесі орнатылуда. Сонымен қатар, демеушілер есебінен 1 800 жеміс ағашы мен 1 215 м² аумаққа сәндік өсімдіктер егілмек. Қала көшелерінде 32 су ұңғымасы іске қосылып, 54 шақырым жол бойына газон төселді.
Жылыжайда өсірілетін гүл көшеттері 2026 жылы қала көшелеріне 1,6 миллионнан астам гүл егуге мүмкіндік береді. Бұл бастама қаланың көркін арттырып қана қоймай, экологиялық тұрақтылық пен бюджеттік үнемділікті қамтамасыз етеді.
Қоғамдық тәртіп пен қауіпсіздік
Қалада алаяқтық, ұрлық және жол-көлік оқиғаларының алдын алу шаралары күшейтілуде. Өткен аптада 176 қылмыстық іс тіркелсе, оның ішінде интернет-алаяқтық жағдайлары басым.
Құзырлы органдар азаматтарды интернет арқылы тауар сатып алғанда сақ болуға және жеке банк карталарын бөгде адамдарға бермеуге шақырады. Сонымен қатар, жол қозғалысы ережелерін қатаң сақтау, балалардың самокат пен скутерді қауіпсіз пайдалануын бақылау қажеттігі ескертілді.
Тұрғын үйлерде ұрлықтың алдын алу мақсатында бейнебақылау камераларын орнату және қырағылық таныту ұсынылды.
Газды қауіпсіз пайдалану мәдениеті
Қала аумағында тұрмыстық газдан улану жағдайларының алдын алу үшін кешенді профилактикалық іс-шаралар жүргізілуде. Қызыл және тәуекел аймақтарында ("Самал", "Қайтпас", "Нұрсәт", "Көксай" және т.б.) түсіндіру жұмыстары жүргізіліп, 2025 абонент бойынша техникалық сәйкессіздіктер анықталды.
Әкімдік мәліметінше, қауіпсіздік мақсатында 230 үй уақытша газ жүйесінен ажыратылып, кемшіліктер жойылғаннан кейін қайта қосылады. ҚР ӘҚБтК-нің 305 және 306 баптарына сәйкес 84 азаматқа жалпы сомасы 1,3 млн теңгеден астам айыппұл салынды.
Мамандар тұрғындарды газ жабдықтарын уақтылы тексеріп, қауіпсіздік ережелерін сақтауға шақырады.
Жалпы, Шымкент қаласында атқарылып жатқан бұл кешенді шаралар мегаполистің экологиялық тазалығын, қауіпсіздігін және тұрғындарға жайлы өмір сүру ортасын қамтамасыз етуге бағытталған.
Шымкент – заманауи инфрақұрылымы дамыған, қауіпсіздік пен экологиялық тұрақтылыққа басымдық беретін қала ретінде тұрақты даму жолында нық қадам жасауда.
Шымкент ІСБ ұсынған материал
