Boeing-777 ұшағының жолаушысы, Nordwind Airlines компаниясына тиесілі рейспен ұшып бара жатқан әйел көз жұмды. Бұл ақпаратты Ақтөбе әуежайы әкімшілігі растады, — деп хабарлайды Massaget.kz тілшісі.
Не болды?
27 мамыр күні күндіз Nordwind Airlines компаниясына тиесілі Boeing-777 ұшағы Ақтөбеге шұғыл қонды. Ұшақ бортында 564 жолаушы болған. Рейс Екатеринбургтен Сочиге бағыт алған, алайда жолаушылардың бірінің жағдайы нашарлауына байланысты Ақтөбеге қонуға мәжбүр болған.
Flightradar сайтындағы мәліметке сәйкес, ұшақ Сочиге жергілікті уақытпен 11:55-те (Астана уақытымен 13:55) қонуы тиіс еді.
Жолаушы көз жұмды
Халықаралық Әлия Молдағұлова атындағы әуежайдың басқарма төрағасы Дастан Малиевтің айтуынша, Екатеринбург – Сочи рейсінің жолаушысы көз жұмған. Бұл қайғылы жағдай ұшақта ма, әлде қонғаннан кейін болғаны әзірге белгісіз. Әйелдің жасы шамамен 42-де болған. Қалған мәліметтер кейінірек жарияланатынын әуежай әкімшілігі мәлімдеді.
Редакция бұл оқиғаға байланысты уәкілетті органдардан түсініктеме сұратты.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
