Ақтөбеде қоқысқа бола қылмысқа барған қария сотталды. Аула сыпырып жүрген ол тазалық сақтамаған жасөспірмге жекіген. Осы кезде баласына араша түскен әкесіне бәкі сұғып алған, — деп хабарлайды Massaget.kz тілшісі "КТК" телеарнасына сілтеме жасап.
Бұл оқиға бес ай бұрын қаланың орталығындағы көп пәтерлі үйдің ауласында болды. Зейнеткерді ол кезде ақтағандар да, даттағандар да болды. Себебі 15 жастағы оқушы аулаға қоқыс тастағанымен қоймай, қартты балағаттаған көрінеді. Ал жасөспірімнің айтуынша, зейнеткер оны жұдырықтап, ауланы айналдыра қуған. Осыдан кейін оқушы әкесіне хабарласады.
Ересектер өзара дауласып, ақыры жетпістегі қария қалтасындағы бәкісін жәбірленушінің ішіне сұғып алған. Телеарна мәліметінше, жәбірленуші де газ тапаншасымен қорқытпақ болған. Қос тараптың уәжін тыңдаған судья зейнеткерді кінәлі деп тауып, үш жылға шартты жаза тағайындады.
"Сот үкімімен сотталушы ҚР ҚК 106-бабы 1-бөлігі бойынша кінәлі деп танылып, оған 3 жыл мерзімге бас бостандығынан айыру түрінде жаза тағайындалды. Сотталушыға тағайындалған жаза шартты деп саналады", — деді Ақтөбе облысы соты баспасөз қызметінің жетекшісі Жансая Тайырова.
Instagram парақшамызға жазылып, ең қызықты ақпараттарды бірінші болып оқыңыз!
