Жаздың аптап ыстығы мен құрғақшылыққа қарамастан шаруалар орташа есеппен 32 центнерден өнім алып жатыр.
Ержан Қайсанов – күріш өсіруді кәсіп еткен шаруалардың бірі. Орақ науқанын он күн бұрын бастаған ол 350 гектарға себілген дақылдың тең жартысын орып, қамбаға құйып үлгерді.
Ержан Қайсанов, шаруашылық жетекшісі:
- Биыл Қызылордадан «Янтарь» деген сұрыпын әкелдік. «Бірінші репродукция» және «Элита». Орташа егін өнімділігі қазіргі таңда 32 центнерден көрсетіп жатыр. Біздің аймақ үшін өте жақсы көрсеткіш.
Тәуір өнім алып, топырақтың құнарын сақтау үшін шаруалар ауыспалы егіс әдісін қолданады. «Технология сақталғанымен су тапшылығы жыл өткен сайын анық сезіліп отыр», — дейді диқандар.
Досан Қайраханов, агроном:
- Каналдарды қалдықтан тазалау керек. Сүзгі болу керек. Каналдарды бетондау керек. Бізге су жеткенше 34 шақырым. 34 шақырымда қанша су кетіп қалды. Күріш сусыз өспейді. Ал бізге күріш екпесек болмайды. Қамыс басып кетеді.
Қаратал ауданында 22 мың гектар жер игеріледі. Тіршілік нәрі өткен ғасырдың 40-жылдары қазылған екі канал арқылы беріледі.
Шыңғыс Қалиден, тілші:
- Қаратал ауданындағы егістік алқаптарды суаратын каналдардың ұзындығы 1700 шақырым. Былтыр соның 192 км табаны тереңдетіліп, арнасы кеңейтілді. Биыл да сондай көлемде жұмыс атқарылмақ.
Ілияс Саяқбаев, Қаратал аудандық Ауыл шаруашылығы және жер қатынастары бөлімінің басшысы:
- Қазіргі уақытта 192 шақырымның 40 шақырымы аяқталды. Жұмыстың аяқталуға 2025 жылдың желтоқсан айында. Барлығы бөлінген қаражат 185 млн теңге. 2025 жылға. 2026 бюджеттік өтінім дайындалуда 200 шақырым тазалау жұмысы жоспарлануда.
Жетісу облысы бойынша Қаратал ауданында ғана күріш өсіріледі. Биыл диқандар аталған дақылды мың гектардай жерге септі. Қара күзге дейін олар 3000 тоннадан аса өнім алып, ел ырысын еселеуді жоспарлап отыр.
Авторлары: Шыңғыс Қалиден, Қуаныш Түргенбаев
