Жазда балалардың жарақат алуы жиілейді. Осыған орай құқықтық ақпараттандыру және түсіндіру жұмыстары күшейді. Мәселен, ұлытаулық тәртіп сақшылары «Полиция – балалардың қорғаны» атты іс-шара ұйымдастырып, оқушыларға жолдағы қауіпсіздік ережелерін түсіндірді. Балалар жас инспекторлардың слетіне қатысып, Полиция департаменті ғимаратына экскурсия жасады.
Жыл басынан бері өңірде жол апатынан балалардың зардап шегу дерегі тіркелмеген. «Бұл полиция мен мұғалімдердің бірлескен жұмысының нәтижесі», – дейді жауаптылар. Оқу жылының басында барлық мектепте инспекторлар сыныбы жасақталды. Онда оқушыларға жолда жүру ережесін түсіндіру бағытындағы іс-шаралар ұйымдастырылды. Жас инспекторлар слетін сол жұмыстың қорытындысы деуге болады.
Қайырбек Рақымбеков, ПД Жергілікті полиция қызметі басқармасы бастығының орынбасары:
- Жол-көлік оқиғаларының алдын алу, оның ішінде балалардың қатысуымен болатын оқиғалардың алдын алу мақсатында шаралар жүргізіліп жатыр. Әрине, жаз кезінде балалардың жарақат алуы болады. Кішкентай балалардың терезеден құлап кетуі болады. Бұл жөнінде де түсіндіру жұмыстарын жүргізіп жатырмыз.
Полиция қорқытпайды, керісінше қорғайды. Сондықтан қоғам тыныштығы жолында жауапты міндетті арқалап жүрген қызметкерлер туралы әр бала білуі тиіс. Осы мақсатта балабақша бүлдіршіндеріне арнап Полиция департаментіне экскурсия ұйымдастырылды. Балалар қызметтік көліктерге мініп, жедел басқару орталығы мен кинология бөлімінің жұмысымен танысты.
Наталья Емельяненко, балабақша тәрбиешісі:
- Мұндай іс-шара бүлдіршіндер үшін өте маңызды. Себебі балалар жас кезінен бастап полиция қызметкерлері туралы білуі тиіс. Тәртіп сақшылары біздің ұжымға да келіп тұрады. Балалармен және олардың ата-аналарымен де құқықтық сауаттылық жайында түсіндіру жұмыстарын жүргізеді.
«Полиция – балалардың қорғаны» тақырыбымен өткен шара алдағы уақытта да жалғасады. Жазғы каникул кезінде балалардың қауіпсіздігін қамтамасыз ету мақсатында «Қауіпсіз аула», «Қауіпсіз маршрут» секілді түрлі акциялар ұйымдастырылады.
Авторлары: Елдос Кәкенов, Нұрдәулет Аманкешов
