Шығыс Қазақстан облысында медицина саласын жасанды интеллект технология көмегімен ілгерілету қолға алынды. Өңірлік онкология және хирургия көпсалалы орталығында медициналық суреттерді жіберу процесі цифрландырылды. Оларды арнайы бағдарлама сараптап, Өскемендегі дәрігерлерге бірден жолдайды. Деректер қала мен ең шалғай аудандардағы жиырма ауруханадан жиналады.
Онкологиялық ауруларды тиімді емдеуде әрбір күн, сағат, тіпті минут қымбат. Сондықтан дәрігерлер қауіпті дертті диагностикалау әдістерін жеделдетуде. Қала мен алыс аудандардан түсетін рентген-суреттер тікелей онкология және хирургия орталығының мамандарына жеткізіледі. Бұрын қағазға шығарылған суреттерді Өскеменге алып келетін, оған бірнеше тәулік кететін еді. Қазір талдау нәтижелерін жасанды интеллект негізіндегі ақылды бағдарлама орындауда.
Гүлмира Сағидуллина, ШҚО Онкология және хирургия көпсалалы орталығының басшысы:
- Бұрын зерттеулер рентген-аппараттарында жасалып, нәтижелері тек рентген-пленкада көрінетін. Ал бүгінгі цифрлық технологиялар мұның бәрін электронды форматта жасауға мүмкіндік береді. Мысалы, шалғай ауданнан келген әйел маммография жасайды да, бір минуттың ішінде бұл сурет біздің орталықтың мамандарына жетеді.
Цифрландыру жобалары аудандардағы рентгенолог мамандардың тапшылығын шешті. Енді олармен Өскемендегі жетекші дәрігерлері тікелей байланыста. Сондай-ақ, науқастардың ауру тарихы да толық цифрландырылған. Жасанды интеллект бағдарламаларының көмегімен дәрігерлер пациенттің картасын жасайды. Картадан науқастың ауырған кезіңдегі тарихын жүйелеген деректі көруге болады. Мұның бәрі дәрігерлердің жұмысын айтарлықтай жеңілдетіп отыр.
Гауһар Әндібаева, облыстық Онкология және хирургия орталығының бөлім басшысы:
- Біздің орталығымызда заманауи құрылғылармен, заманауи сәулемен емдеу әдістерін қолдануымыз, бізге пациентті емдеу кезінде жоғарғы дәлдіктік пен қауіпсіздік және үлкен тиімділікті қамтамасыз етеді.
Бұдан бөлек, өңірде «жасыл дәліз» жүйесі жұмыс істейді. Ол 30 күн ішінде қатерлі ісікке күдік тудыратын барлық жағдайлар шұғыл тексеруге мүмкіндік береді. Нәтижесінде, ауру жедел анықталып, әрі қарайғы емдеу тактикасы анықталады. Жоғары дәлдіктегі скринингтік тексерулердің арқасында ісіктің шамамен 40%-ы нөлдік және бастапқы кезеңде анықтауға қол жеткізілді. Жолдауда мемлекет басшысы Үкіметке жасанды интеллектіні қолдану арқылы медицина саласының сапасы мен көлемін бақылаудың жаңа жүйесін құруды тапсырған болатын. Ендеше, өскемендік дәрігерлердің тәжірибесі еліміздің өзге өңірлерінде де кеңінен қолданылуы тиіс.
Авторлары: Арыстанбек Кенже, Вячеслав Ветлугин, Жігер Бабаханов
