Семейде облыстық сот ғимаратының маңында ТЭЦ-тің үш қызметкері кәріз құдығына түскен, соның ішінде екеуі есінен танып қалған, деп жазады Egemen.kz.
Алғашқылардың бірі болып көмекке ҚР ІІМ мамандандырылған күзет қызметі басқармасының қызметкерлері – полиция старшинасы Аслан Какенов, полиция аға сержанты Ерзат Баймулаев, полиция аға сержанты Айгерім Мұхтарбекова және полиция кіші сержанты Тұрсынбек Айтқазы жетті.
Ерзат Баймулаев өз өміріне қауіп төнсе де, арнайы қызметтердің келуін күтпестен әрекетке көшті. Ол өзін арқанмен байлап, газтұмылдырық киіп құдыққа түсті. Жоғарыда әріптестері Какенов пен Айтқазы оны сақтандырып тұрды. Нәтижесінде олар естен танған екі жұмысшыны жер бетіне көтеріп шығарды.
– Іште электрик құлап жатқанын көрдім. Тағы екі адам бар екенін білген соң, жанымдағы серіктесім газтұмылдырық әкелуімді сұрады. Мен дереу ішке кіріп, газтұмылдырық алып шықтым. Сол уақытта жедел жәрдем келді. Серіктесім қызметкерлерді шығару керектігін айтты. Себебі оларды жоғалтып алуымыз мүмкін еді. Мен еш ойланбастан ішке түстім, – дейді Облыстық Полиция департаментінің аға сержанты Ерзат Баймулаев.
