Мәжіліс депутаты Бақытжан Базарбек "Қайрат" – "Реал Мадрид" матчын Астана Аренада өткізуді ұсынды, деп хабарлайды Skifnews.kz ақпарат порталы .
Депутаттың айтуынша, шетелдік жанкүйерлер, соның ішінде "Реал Мадрид" жанкүйерлері, стадионға және жолдың ұзақтығына, қыркүйек айының аяғындағы суық ауа райына да наразы болуы мүмкін.
"Жанкүйерлер мен Уэльс футбол федерациясы Қазақстандағы футбол стадиондарының жағдайына шағымданды. Сондықтан Қазақстанның абыройы үшін қажет болса негізгі аренаға көшіретіндей футбол федерациясы бар мүмкіндікті қолдануы керек. Аутсайдерлермен басқа ойындарды "Қайраттың" өз алаңында ойнатқан дұрыс", – деді ол.
Айта кетейік, "Қайрат" – "Реал Мадрид" кездесуі 30 қыркүйекте Алматыда өтеді деп жоспарланған. Ойын билеттері 20 қыркүйекте сатылымға шығады.
