БАҚ-та премьер-министрдің орынбасары — cыртқы істер министрі Мұрат Нұртілеу ұсталғаны туралы ақпарат шындыққа жанаспайды. Мәдениет және ақпарат министрі Аида Балаева осы ақпаратқа пікір білдірді, — деп хабарлайды Massaget.kz тілшісі.
Айта кетейік, бүгін СІМ басшысы ұсталғаны туралы ақпарат тарап кетті. Алайда бұл жалған ақпарат болып шықты.
"Кейбір ресми БАҚ пен аноним Telegram арналарда мемлекеттік қызметшілердің ұсталуына қатысты расталмаған ақпарат тарап жатыр. Ақпарат таратқанда оның шынайылығын тексеру міндетті. Кінәсіздік презумпциясы қағидасы және журналистік этика бар екенін естен шығармау қажет. Расталмаған, "хайп қуған" деректерге еремін деген журналистер мұндай мәлімет азаматтарға және олардың жақын туыстарына зиян тигізуі, ар-намысы мен қадір-қасиетіне нұқсан келтіруі, жала болып шығуы мүмкін екенін есте ұстауға тиіс. Әріптестерді кәсіби БАҚ пен журналистер сақтауға тиіс міндеттемелерді орындауға шақырамын. Сондай-ақ, жалған ақпарат таратқаны үшін әкімшілік әрі қылмыстық жауапкершілік қарастырылғанын еске саламын", — деді министр Аида Балаева.
Еске салайық, Мұрат Нұртілеу 2023 жылғы 3 сәуірден бастап премьер-министрдің орынбасары — сыртқы істер министрі болып тағайындалды.
Қызықты жаңалықтар мен видеоларды көру үшін TikTok арнамызға жазылыңыз!
