"Сүт ішсең, денің сау болады!" деген кеңес кең тараған. Шынында да, сүттің денсаулыққа пайдалы қасиеті көп. Бірақ өте майлы сүттің пайдасы аз. 3,5% майы бар сүт ауыр және өлімге әкелуі мүмкін аурулардың қаупін арттыратыны анықталды, — деп хабарлайды Massaget.kz тілшісі " Доктор Питерге" сілтеме жасап.
Бұл туралы эндокринолог, медицина ғылымдарының докторы Зухра Павлова өзінің Telegram-арнасында жазды.
Ғалымдар не анықтады?
Бұл тұжырым Norwegian Counties Study атты ұзақ мерзімді зерттеуге негізделген. Оның авторлары ас мәзіріндегі қаныққан майдың атеросклероз бен жүрек ауруларын дамытудағы рөлін растады.
Норвегиялық ғалымдар 30 жыл бойы 73 мың адамның деректерін зерттеп, үнемі майлы сүт ішкендерде өлім қаупінің артқанын байқады (тәуекел коэффициенті – 1,15). Әсіресе жүрек-қантамыр ауруларынан (1,07) және ишемиялық жүрек ауруынан (1,13) өлім қаупі жоғары болды.
Ал майлылығы 1,5%-дан төмен немесе майсыз сүт ішкендерде мұндай тәуекел байқалмады.
Павлованың айтуынша, бұл зерттеудің нәтижесін әсіресе холестерині жоғары, артық салмақ немесе жүрек аурулары бар адамдар ескергені жөн. Олар майлығы төмен сүтті таңдауы немесе оны ашытылған сүт өнімдерімен алмастырғаны дұрыс.
Майсыз сүт өнімдерінің кемшіліктері
Диетолог Ксения Пустоваяның айтуынша, майсыз сүт өнімдерінің де өз кемшіліктері бар. Мысалы, олардың калориясы аз, бұл кейбір арықтағысы келетіндер үшін тұзақ болуы мүмкін. "Майсыз сүзбе ғой, көп жесем де семірмеймін" деп ойлап, артық калория тұтыну қаупі жоғары.
Сонымен қатар, майсыз өнімдер ұзақ уақыт бойы тоқтығын сездірмейді, сондықтан мұндай жеңіл тағамнан кейін қарын тез ашады.
Дәмінің жеткіліксіздігі де мәселе: өндірушілер оны тәттілендіргіштер, крахмал мен бояғыштар қосып "түзетеді".
Бұдан бөлек, майсыз сүт өнімдерінен кальцийдің сіңуі де қиынырақ, себебі оған қажет А және D дәрумендері маймен бірге жоғалады.
Пустоваяның айтуынша, майсыз өнімдер салмақ тастағысы келген кезде немесе сирек жеңіл тағам ретінде пайдалы. Бірақ оларды күнделікті тұрақты түрде тұтынудың қажеті жоқ.
Instagram парақшамызға жазылып, ең қызықты ақпараттарды бірінші болып оқыңыз!
