Оралда 8 жастағы Артём есімді бала 96 пайыз денесін күйік шалып, көз жұмды. Полиция бұл жағдайды «кездейсоқ оқиға» деп бағаласа , ата-анасы ұлдарының сөзін ескеріп, әдейі өртелгенін мәлімдеуде, деп жазады Skifnews.kz ақпарат порталы.
Қайғылы оқиға 10 тамызда болған. Артём демалыста әжесінің үйінде жүрген. Сол күні анасына қоңырау шалған әжесі “Артём өртеніп кетті” деп айқайлап жеткізген. Анасы дереу бейнеқоңырау арқылы баласын көреді. Қасында полицей мен әжесі болған, Артёмның денесі түгелдей күйген. Бірақ есін біліп, бірнеше рет: “Мені өлтіргісі келді” деген сөздерді айтқан.
Бала ауыр халде ауруханаға жеткізілді. Дәрігерлер “бар күшімізді салып жатырмыз, бірақ біз Құдай емеспіз, дұға қылыңыздар” деген. Бір аптадан соң Артём көз жұмды.
Полицияның нұсқасы бойынша, Артём басқа балалармен ойнап жүріп, көліктің багажнигінде тұрған канистрден бензин алып, оны төгіп, өзі от тұтатқаны айтылған. Сол сәтте жалын киіміне көшіп, бала өртке оранған. Ал ата-анасы бұл нұсқаны жоққа шығарады.
Олардың сөзінше, оқиға куәгері болған балалардың бірі 6 жастағы Тамерлан Артёмға “өз-өзіңді өртесең ақша беремін” деп ұсыныс жасаған. Артём келіспеген соң, Тамерланның өзі оның үстіне бензин шашып, от тұтатқаны айтылған. Мұны бірнеше бала көргенімен, полицейлер оларды жауап алмаған.
Сондай-ақ, Артёмға алғашқы көмек көрсеткен жасөспірімдер оқиға орнында ересектердің болғанын айтады. Бірақ олар да тергелмеген. Тіпті, баланың әжесі мен “баламды өлтіргісі келді” деген сөзін естіген дәрігерлер де шақырылмаған. Істе бар болғаны үш сауалнама ғана тіркелген: көліктің иесі (оқиға кезінде жерде болмаған), Тамерлан және жағдайға қатысы жоқ басқа бір бала.
Артёмның ата-анасы:
“Біз баламызды қайтармайтынымызды білеміз. Бірақ әділдікті талап етеміз. Бүгінгі материалдар Артёмды кінәлі қылып көрсетіп отыр. Ал егер бұл шынымен басқа бала жасаған болса, ол басқа балалар үшін де қауіпті. Біз тек толыққанды тергеу жүргізіліп, шынайы куәгерлерден жауап алынуын және сараптаманың нәтижесі ескерілсін дейміз. Қалайша іс әлі дайын емес сараптамаға қарамай-ақ тоқтатылды?!” – дейді.
Қазір ата-ана полицияға да, прокуратураға да арыз түсірген. Полициядан істі қайта тергеуді, ал прокуратурадан тәртіп сақшыларының әрекетсіздігін тексеруді талап етуде.
Уақыт өткеніне қарамастан, қайғыдан қан жұтқан ата-ана әділдіктің орнайтынына үміт артып отыр.
