Келесі жылдан бастап қазақстандық дәрігерлер дәрі-дәрмек рецептін қағазға жазып бермейді. «Әлеуметтік әмиян» жобасы аясында енді мұның барлығы электрондық жүйе арқылы жүзеге асады. Денсаулық сақтау министрлігі пилоттық жобаны қолға алды.
Әзірге тек емхана жанындағы дәріханалардан тегін дәрі-дәрмек қана алуға болады. Түсіндіре кетсек, бұл жүйе арқылы науқастарға дәрі-дәрмек электрондық рецепт бойынша беріледі. Бұрын қағаз рецептті жоғалту қаупі болса, қазір дәрігердің жазып бергені бірден жүйеге тіркеледі.
Азамат дәріханаға келгенде eGov Mobile немесе басқа қосымшадағы QR-кодты көрсетсе жеткілікті. Келер жылдан бастап бұл жүйеге жекеменшік дәріханалар да қосылады. Пилоттық жоба сәтті өтсе, тек тегін препараттар ғана емес, дәрі-дәрмектің кез келген түрін электрондық рецепт арқылы алуға мүмкіндік туады.
Асқар Арғынбаев, ҚР ДСМ Электрондық денсаулық сақтауды дамыту департаментінің директоры:
«Бүгіннің өзінде 1,6 миллион бірегей пациент осы жоба аясында 8 миллионнан аса электрондық рецепт арқылы дәрі-дәрмекпен қамтамасыз етілді. Мұның бір артықшылығы – пациенттерімізге ыңғайлылығынан бөлек, жазылған рецепттер мен берілген дәрі-дәрмектердің есебі ашықтығы мен толықтығы қамтамасыз етіледі».
Елдос Есенбол
