Қазақстан Ауыл шаруашылығы министрлігінің Ветеринариялық бақылау және қадағалау комитеті БАҚ-та тараған Қазақстаннан Түрікменстанға жұқпалы ет жеткізілді деген хабарламаларға байланысты ресми мәлімдеме жасады, — деп хабарлайды Massaget.kz тілшісі.
Ведомствоның айтуынша, мұндай деректер шындыққа жанаспайды.
"2025 жылы Қазақстаннан Түрікменстанға ет өнімдері жеткізілген жоқ. Жекелеген дереккөздерде таратылған Ақмола облысынан бруцеллезі бар ет Түрікменстанға жөнелтілді деген ақпарат шындыққа сәйкес келмейді", – делінген хабарламада.
Комитет тек уәкілетті мемлекеттік органдардың ресми ұстанымына сүйенуді ұсынды.
Еске салайық, бұған дейін "Түрікменстан хроникасы" басылымы жұқпалы еттің балалар мекемелері мен сауда желілеріне түскені жөнінде хабар таратқан еді. Онда бұл өнім партиялары Ақмола облысынан жеткізіліп, Түрікменстанның түрлі өңірлеріне, соның ішінде балалар үйлері мен балабақшаларына таратылды деп жазылған болатын.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
