0:00:00

0:00:00

Жаңалықтарды Telegram арнамыздан оқыңыз!

Станмұл қаласында этноспорт мәдени фестивалі басталды. Фестивальге әлемнің 20-ға жуық елінен мыңнан аса спортшы мен өнерпаз жиналған. Ұлттық спорт ойындарын дәріптеу мақсатында ұйымдастырылған шараға Қазақстаннан да спортшылар қатысып жатыр. Халықаралық жиын аясында дәстүрлі спорт түрлері бойынша сайыстар, қолөнер бұйымдары мен ұлттық тағамдар көрмесі өтеді. Түркиядағы тілшіміз Айдос Әшімұлының материалы.

Осымен жетінші рет ұйымдастырылып отырған ұлттық спорт фестиваліне жыл өткен сайын қызығушылық артып келеді. Әсіресе ат спорты түрлеріне көрермен көп жиналады. Түркияда да кейінгі жылдары жастар атқа мінуге құмарта бастаған.

Ертан Еркекоғлы, Балыкесир ат спорты клубының жетекшісі:

Мен жастайымнан аттың үстіндегі адаммын. Қазір арнайы клуб құрып, жастарды осы өнерге баулып келемін. Бір кездері ұмытыла бастаған ұлттық ат спортына кейінгі жылдары жастар арасында өте қатты қызығушылық бар. Бірнеше жылдан бері ат үстіндегі спорт түрлерін жастарға үйретіп келеміз.

Бүкіләлемдік этноспорт конфедерациясы ұйымдастырған бұл фестивальге Қазақстаннан жыл сайын спортшылар қатысады. Биылғы сайысқа балуандар мен аударыспақ және асық ату спортының өкілдері келген.

Алмат Ләтіпбек, Аударыспақ спортынан Азия чемпионы:

Түркия елінде болып жатқан фестивальге көрсетілім ретінде келдік. Аударыспақ спортынан екі спортшы келдік. Қазақстанда болды көшпенділер ойыны одан да бірінші орын алдым. Түркия халқы өте қызығушылықпен қарап жатыр аударыспаққа. Атқа қызығатын халық екен.

Фестиваль әсіресе балалар үшін қызыққа толы. Түрлі ұлттық ойындар мен көңілді шаралар көп өтеді. Төрт күн ішінде фестивальді тамашалауға 400 мың оқушы келеді.

Абдулсамед Евлияоғлы, 2-сынып оқушысы:

Маған аттар қатты ұнады. Сосын әртүрлі ойындар ойнадым. Садақ атып көрдім. Бұрын білмеген ойындар үйрендім.

Этноспорт фестиваліне жыл сайын миллионға жуық көрермен жиналады. Көпшілікке тек спорт емес әр халықтың қолөнер бұйымдары, ұлттық тағамдары мен салт дәстүрлері де таныстырылады.

Айдос Әшімұлы