Алматы облысындағы Сорбұлақ су қоймасынан үшінші адамның денесі шығарылды. Іздестіру жұмыстары әлі жалғасып жатыр.
Қорғаныс министрлігінің баспасөз қызметінің дерегінше, табылған мәйіт — экипаж командирінің көмекшісі, капитан Аман Амангелді. Ол күрделі жағдайларда бірнеше мәрте ұшып жаттыққан, тәжірибелі ұшқыш. Оның EC-145 тікұшағындағы ұшу уақыты 295 сағат еді. Ал кеше борт техник, капитан Бақтияр Ержігітовтің денесі табылды. Марқұмның EC-145 тікұшағын басқаруда тәжірибесі жеткілікті, жалпы ұшу уақыты – 300 сағат болған. Ал осыдан екі күн бұрын экипаж командирі, майор Нұржігіт Үйсінбаевтың денесі шамамен 14 метр тереңдікте анықталған. Тәжірибелі ұшқыштың жалпы ұшу уақыты – 930 сағат болған.
Қаза тапқандардың үшеуі де Әуе қорғанысы күштері әскери институтының түлектері. Қазіргі уақытта іздеу жұмыстарымен бірге апаттың себептерін анықтау үшін тергеу амалдары жүргізіліп жатыр.
Жәнібек Жұмашев, ҚР ҚК ӘҚК әскери-әуе күштері қолбасшысының бірінші орынбасары, штаб бастығы:
Экипаж құрамы әртүрлі жағдайда ұшуға дайын болған. Әртүрлі әскери әуе күштерінің қатысуымен жаттығуға қатысатын. Тікұшақтың бүкіл бөлігі табылғанша және де қазаның нақты себебін анықтау үшін жұмыстар жалғасады.
Айдана Қуантхан
