Жыл соңына дейін Қазақстанда алты жаңа өндіріс іске қосылмақ .
Атырауда – машина жасау зауыты, Түркістан облысында – Орталық Азиядағы ең ірі жылыжай кешені, ал Алматыда – көлік зауыты салынады. Сонымен қатар ферроқорытпа кешені, құс фабрикалары мен жел электр станцияларын салу жоспарда бар.
Биылғы жеті айда Қазақстанның Даму банкі тобы зауыттар, инфрақұрылым нысандары мен экспорттық операцияларға 1 трлн 300 млрд теңге құйған. Қазір банк 18 ірі жобаны қаржыландырып жатыр. Оның алтауы жыл соңына дейін пайдалануға берілмек. Жалпы алдағы үш жылда елімізде 26 жаңа өндіріс іске қосылады.
Марат Елібаев, Қазақстан Даму банкінің басқарма төрағасы:
- Мұнай-газ саласына қажет ірі көлемді резервуарлар, жылуалмастырғыштар өндірілетін болады. Сонымен қатар кальциленген сода шығаратын ірі жоба жүзеге асырылып жатыр. Маңғыстау облысында жел электр станциясы салынып жатыр. Бұл да маңызды жобалардың бірі.
Қазақстан Даму банкі ашылғаннан бері 140 кәсіпорынның құрылысын қаржыландырды. Нәтижесінде 34 мыңнан астам адам жұмысқа тұрды. Айта кету керек, жаңа өндіріс орындары арқылы жергілікті бюджетке салық түседі. Сондай-ақ шағын және орта бизнеске тапсырыстар артады. Осындай жобаларды көбейту үшін кәсіпкерлерге арнайы шарттар ұсынылады. Бастысы жеңілдетілген несиелер, кепілдіктер және жобаның барлық кезеңінде қолдау көрсетіледі.
Марат Елібаев, Қазақстан Даму банкінің басқарма төрағасы:
- Экспортқа бағытталған жобаларды біз сыртқы нарықтардан тартылған қаражат есебінен қаржыландырамыз. Ал теңгемен жұмыс істейтін жобаларды 12,6% мөлшерлемемен қаржыландырамыз. Айта кету керек, қазіргі базалық мөлшерлеме жоғары – 16,5%. Демек 16,5%-дан төмен кез келген несие – бұл мемлекет тарапынан ұсынылатын жеңілдік.
Банк өкілдерінің айтуынша, тұрақты пайыздық мөлшерлеме бизнеске бюджетті жоспарлауға және жобаларды тезірек іске қосуға мүмкіндік береді. Ал бұл өз кезегінде ел экономикасының өсуін қамтамасыз етеді.
Ғазиза Мұхамеджанова, Ержан Рахманбердиев, 24KZ
